માનપુર પાસે નેશનલ હાઈવે પર તેલ ભરેલું ટેન્કર પલ્ટાયું: તેલ લૂંટવા ગ્રામજનોની પડાપડી

બનાસકાંઠા જિલ્લાના થરા-શિહોરી નેશનલ હાઈવે પર આજે તેલ ભરેલું એક ટેન્કર પલ્ટી જતાં અફરાતફરીનો માહોલ સર્જાયો હતો. પ્રાથમિક માહિતી મુજબ, કંડલાથી દિલ્હી તરફ જઈ રહેલા ટેન્કરના ચાલકે સ્ટીયરિંગ પરથી કાબૂ ગુમાવતા અકસ્માત સર્જાયો હતો.

અકસ્માત બાદ ટેન્કરમાંથી મોટા પ્રમાણમાં તેલ લીક થવા લાગ્યું હતું. ઘટનાની જાણ આસપાસના વિસ્તારોમાં ફેલાતાં જ ગ્રામજનો ડબ્બા, ડોલ અને અન્ય વાસણો લઈને તેલ એકત્ર કરવા માટે ઘટનાસ્થળે દોડી આવ્યા હતા. જેના કારણે હાઈવે પર ભારે ભીડ અને અફરા તફરીના દ્રશ્યો સર્જાયા હતા.

ઘટનાની જાણ થતાં જ શિહોરી પોલીસ તાત્કાલિક ઘટનાસ્થળે પહોંચી હતી. પોલીસે તેલ લેવા ઉમટી પડેલી ભીડને હટાવી પરિસ્થિતિ પર કાબૂ મેળવ્યો હતો તેમજ ટ્રાફિક વ્યવસ્થા પણ પુનઃસ્થાપિત કરી હતી. અકસ્માતમાં કોઈ જાનહાનિ થઈ છે કે નહીં તે અંગે હજુ સુધી સત્તાવાર માહિતી સામે આવી નથી. પોલીસે સમગ્ર ઘટનાની વધુ તપાસ હાથ ધરી છે.