મંત્રી પ્રવીણભાઈ માળીના હસ્તે ગિલ્લી-દંડા ટુર્નામેન્ટનો પ્રારંભ કરાયો
ડીસા સ્પોર્ટ્સ કોમ્પ્લેક્સ ખાતે મેજર ધ્યાનચંદજીની જન્મજયંતિ નિમિત્તે 'રાષ્ટ્રીય રમત દિવસ'ની ઉત્સાહભેર ઉજવણી કરવામાં આવી હતી. આ પ્રસંગે વન અને પર્યાવરણ રાજ્યમંત્રી પ્રવીણભાઈ માળીના વરદ હસ્તે પરંપરાગત ગિલ્લી-દંડા ટુર્નામેન્ટનો ભવ્ય પ્રારંભ કરવામાં આવ્યો હતો, જેમાં મંત્રીએ જાતે ગિલ્લી-ડંડા રમીને બાળપણની યાદો તાજી કરી હતી અને પરંપરાગત રમતોને જીવંત રાખવાનો પ્રેરણાદાયી સંદેશ આપ્યો હતો.
આ અવસરે રાજ્ય અને રાષ્ટ્રીય કક્ષાએ ઉત્કૃષ્ટ પ્રદર્શન કરનાર જિલ્લાના પ્રતિભાશાળી રમતવીરોનું મંત્રીશ્રી દ્વારા વિશેષ સન્માન અને અભિવાદન કરવામાં આવ્યું હતું. તેમણે ભારપૂર્વક જણાવ્યું હતું કે આધુનિક રમતોની સાથે-સાથે ગિલ્લી-દંડા જેવી આપણી વિસરાતી જતી પરંપરાગત રમતોને પણ પ્રોત્સાહન અપાશે, જેથી બાળકો અને યુવાનોમાં રમતગમત પ્રત્યેનો લગાવ વધે.
ઉજવણીના ભાગરૂપે સ્પોર્ટ્સ કોમ્પ્લેક્સ ખાતે વિવિધ રમતગમત પ્રવૃત્તિઓને લીલી ઝંડી આપી પ્રસ્થાન કરાવવામાં આવ્યું હતું. આ કાર્યક્રમનો મુખ્ય ઉદ્દેશ્ય બાળકો અને યુવા પેઢીમાં સ્વાસ્થ્ય પ્રત્યે જાગૃતિ ફેલાવવાની સાથે તેમને રમતગમત ક્ષેત્રે કારકિર્દી બનાવવા માટે પ્રોત્સાહિત કરવાનો રહ્યો હતો. આ પ્રસંગે સ્થાનિક અગ્રણીઓ, રમતગમત વિભાગના અધિકારીઓ અને મોટી સંખ્યામાં ઉત્સાહી ખેલાડીઓ ઉપસ્થિત રહ્યા હતા.
