મોડાસાઅરવલ્લી જિલ્લાના મુખ્ય મથક મોડાસા પંથકમાં તસ્કરોએ ફરી એકવાર માથું ઊંચક્યું છે. મોડાસાના સાકરીયા ગ્રામ્ય વિસ્તારમાં તસ્કરોએ તરખાટ મચાવતા એકસાથે 15થી વધુ ખેતરોને નિશાન બનાવી લાખોની કિંમતના વીજ કેબલની ચોરી કરી છે. મધરાત્રે થયેલી આ સામૂહિક ચોરીને પગલે ખેતીકામ કરતા જગતના તાતમાં ભારે રોષ અને ફફડાટ જોવા મળી રહ્યો છે.
એક તરફ ખેડૂતો મોંઘા ભાવના બિયારણ અને ખાતર લાવી ખેતી કરી રહ્યા છે, ત્યારે બીજી તરફ તસ્કરોની આ લૂંટને કારણે સિંચાઈના કામો ખોરવાઈ ગયા છે. આ ઘટનાને પગલે સ્થાનિક ખેડૂતોએ પોલીસ તંત્ર સામે સવાલો ઉઠાવ્યા છે અને રાત્રિ દરમિયાન પોલીસ પેટ્રોલિંગ સઘન બનાવવાની ઉગ્ર માંગ કરી છે. હાલમાં આ મામલે પોલીસે અજાણ્યા શખ્સો વિરુદ્ધ તપાસનો ધમધમાટ તેજ કર્યો છે.
