નામદાર ગુજરાત હાઈકોર્ટના આદેશ અનુસાર અને બનાસકાંઠા ડિસ્ટ્રિક્ટ જજ એ.જે કાનાણીના હસ્તે ડીસા ખાતે નવનિર્મિત આકસ્મિક આરોગ્ય સેવા કેન્દ્ર અને કેન્ટીનનું ઉદ્ઘાટન કરવામાં આવ્યું હતું. ગુજરાતમાં પ્રથમ નંબરના આકસ્મિક સેવા કેન્દ્રના શુભારંભથી વકીલો અને પક્ષકારોમાં આનંદની લાગણી ફેલાઈ ગઈ છે.
ડીસા અને પાલનપુર ખાતે શરૂ કરાયેલું આ આકસ્મિક આરોગ્ય સેવા કેન્દ્ર સમગ્ર ગુજરાતમાં પ્રથમ નંબરનું છે. કોર્ટ સંકુલમાં કામગીરી દરમિયાન અચાનક તબિયત બગડે કે કોઈ ઈમરજન્સી ઊભી થાય, ત્યારે વકીલો, પક્ષકારો અને સ્ટાફના સભ્યોને તાત્કાલિક અને ઝડપી સારવાર મળી રહે તે માટે આ વિશેષ વ્યવસ્થા કરવામાં આવી છે.
આ સેવા કેન્દ્રનો પ્રારંભ ડિસ્ટ્રિક્ટ જજ એ.જે. કાનાણીના વરદ હસ્તે કરવામાં આવ્યો હતો. આ પ્રસંગે પાલનપુરના જ્યુડિશિયલ મેજિસ્ટ્રેટ વાજપેયી, એ. આર ત્રિવેદી, એમ. બી. વાજપેયી, મારફતિયા સાહેબ, એમ. એચ. ત્રિવેદી, ડીસા બાર એસોસિએશન પ્રમુખ એલ.બી ખત્રી, સેક્રેટરી એમ.પી પઢીયાર, મેડિકલ સ્ટાફ ડીસા, કોર્ટનો સ્ટાફ, એસોસિએશનના વકીલો હાજર રહ્યાં હતાં.
આરોગ્ય કેન્દ્ર ઉપરાંત ડીસા કોર્ટ પરિસરમાં નવી કેન્ટીનનું પણ ઉદ્ઘાટન કરવામાં આવ્યું છે, જેનાથી દૂર-દૂરથી આવતા પક્ષકારો અને વકીલોને ભોજન તથા નાસ્તાની ઉત્તમ સુવિધા મળશે. બાર એસોસિએશન દ્વારા નામદાર ડિસ્ટ્રિક્ટ કોર્ટ સમક્ષ કરવામાં આવેલી અરજીને ધ્યાને લઈ આ સરાહનીય કાર્યો પૂર્ણ કરવા બદલ મહાનુભાવોનો આભાર વ્યક્ત કરવામાં આવ્યો હતો. આ સુવિધાઓથી કાનૂની સેવા સાથે જોડાયેલા તમામ લોકોને મોટો લાભ મળશે.
