ખેડૂતોએ ભાવ 2000 થી પણ વધુ મળવો જોઈએ તેવી આશા વ્યકત કરી
પાટણ માર્કેટ યાર્ડમાં નવરાત્રી પહેલાં સોમવારથી કપાસની ખરીદી શરૂ થતાં જ 1025 મણ કપાસની આવક થઈ હતી. પ્રથમ વીણીનો કપાસ હોવાથી ક્વોલિટી સારી રહી હતી અને પ્રતિમણ રૂ.1675થી રૂ.2501 સુધીના ભાવ પડ્યા હતા. જોકે સરેરાશ ભાવ રૂ.1812 રહ્યો હતો.બીજી તરફ, ખેડૂતોનો હિસાબ કહે છે કે, વીઘા દીઠ રૂ.22,800ના ખર્ચ સામે કપાસનો ભાવ રૂ.2000 થી વધુ મળવો જરૂરી છે. પાછોતરા વરસાદથી એક વીઘે આશરે 5 મણ ઉત્પાદન ઘટવાની ભીતિ પણ છે.
પાટણ જિલ્લામાં આ વર્ષે દેશી અને બીટી મળી કુલ 41 હજાર હેક્ટરમાં કપાસનું વાવેતર થયું છે. તેમાં 20 હજાર હેક્ટરથી વધુ બીટી કપાસ છે.બીટી કપાસની વીણી શરૂ થતાં હવે યાર્ડમાં આવક શરૂ થઈ છે. સામાન્ય સ્થિતિમાં એક વીઘામાં આશરે 20 મણ ઉત્પાદન થતું હોવાનું ખેડૂતો જણાવે છે, પરંતુ વરસાદથી પાકને નુકસાન થતાં ઉત્પાદન ઘટી શકે છે.
ખેડૂતોના જણાવ્યા મુજબ એક વીઘા બીટી કપાસ પાછળ ખેડ, બિયારણ, ખાતર, સિંચાઈ, નિંદામણ, વીણી અને યાર્ડ સુધીના પરિવહન સહિત આશરે રૂ.22,800 ખર્ચ થાય છે. રૂ.1800નો સરેરાશ ભાવ અને 20 મણ ઉત્પાદન ગણીએ તો કુલ રૂ.36 હજારની આવક થાય છે. એટલે ખર્ચ બાદ માત્ર રૂ.14 હજાર જેટલું બચે છે. વરસાદથી ઉત્પાદન 5 મણ ઘટે તો આ આવક સીધી ઘટી શકે છે. આથી મોંઘવારીના સમયમાં ખેડૂતો રૂ.2000થી વધુ ભાવની અપેક્ષા રાખી રહ્યા છે.
