મહેસાણા જિલ્લાની લોકલ ક્રાઈમ બ્રાન્ચ (LCB) ની ટીમે વડનગર શહેરમાં ચાલતા વરલી-મટકાના ગેરકાયદેસર જુગારધામ પર મોટી કાર્યવાહી કરી છે. પીઆઇ એ.એમ.કામળિયાની સૂચના હેઠળ એલસીબીની ટીમે પેટ્રોલિંગ દરમિયાન મળેલી ચોક્કસ માહિતીને આધારે વડનગરના નવા બસ સ્ટેન્ડ નજીક, મુનીરાજ કોમ્પલેક્ષ સામે આવેલી દરગાહની પાછળના ખુલ્લા મેદાનમાં ઓચિંતી રેડ પાડી હતી.
પોલીસની આ અચાનક કાર્યવાહી દરમિયાન સ્થળ પરથી બે શખ્સો જુગાર રમતા રંગેહાથ ઝડપાઈ ગયા હતા. પકડાયેલા આરોપીઓની ઓળખ શૈલેષજી ઇશ્વરજી ઠાકોર અને રમેશજી ખેંગારજી નાથાજી ઠાકોર (બંને રહેવાસી: ભાલેસરા ઠાકોરવાસ, વડનગર) તરીકે થઈ છે. પોલીસે આ બંને પાસેથી રોકડા રૂપિયા ૧૧,૨૮૦ અને ૧,૦૦૦ રૂપિયાની કિંમતનો એક મોબાઈલ ફોન મળીને કુલ ૧૨,૨૮૦ રૂપિયાનો મુદ્દામાલ જપ્ત કર્યો છે.
જોકે, આ જુગારના અડ્ડાનું સંચાલન કરનાર મુખ્ય આરોપી ભુરાભાઈ ઉર્ફે રણજીતજી જયંતીજી ઠાકોર પોલીસની પકડમાંથી ભાગવામાં સફળ રહ્યો હતો. પોલીસે તેને વોન્ટેડ જાહેર કરીને તેની શોધખોળ હાથ ધરી છે. આ સમગ્ર ઘટના અંગે વડનગર સ્માર્ટ પોલીસ મથકમાં ગુનો દાખલ કરવામાં આવ્યો છે અને આગળની કાયદાકીય તપાસનો દોર શરૂ કરવામાં આવ્યો છે.
