શ્રાવણીયા જુગારની મોસમમાં બીજી સફળ કાર્યવાહી, ફ્લડલાઇટના અજવાળે જુગાર રમતા 4 શખ્સો ઝડપાયા
ડીસા તાલુકામાં શ્રાવણીયા જુગારની મોસમ ખીલી હોય તેમ એક બાદ એક જુગારની રેડ સામે આવી રહી છે. ગઈકાલે બુરાલ ગામેથી જુગારીઓ ઝડપાયા બાદ હવે રસાણા મોટા ગામની સીમમાં દાંતીવાડા મેઇન કેનાલ પાસે એલસીબીએ દરોડો પાડી ફ્લડલાઇટના અજવાળે ગંજીપાના વડે જુગાર રમતા ચાર શખ્સોને રંગેહાથ ઝડપી પાડ્યા હતા.
પોલીસને ખાનગી બાતમી મળતાં ખુલ્લી જગ્યામાં રેડ કરવામાં આવી હતી. પોલીસે ચારેય શખ્સોને ઝડપી લઈ તેમની પાસેથી ગંજીપાના તથા રોકડ મળી કુલ રૂ.16,260 નો મુદ્દામાલ જપ્ત કર્યો હતો.પકડાયેલા શખ્સોમાં પ્રહલાદજી બાબુજી અદાવત (ઉ.વ.47), પીન્ટુજી ભવાનજી સોલંકી (ઉ.વ.31), પરેશજી શારજીજી કોટડીયા (ઉ.વ.27) અને રાકેશજી પોપટજી સોલંકી (ઉ.વ.27) તમામ રહે. રસાણા ગામ, તા. ડીસાનો સમાવેશ થાય છે.
ડીસા રૂરલ પોલીસે ચારેય વિરુદ્ધ જુગારધારા હેઠળ ગુનો નોંધી કાયદેસરની કાર્યવાહી હાથ ધરી છે. તાલુકામાં શ્રાવણ માસ દરમિયાન જુગાર સામે પોલીસની કાર્યવાહી વધુ તેજ બને તેવી શક્યતા છે. તેથી જુગારીયા ફફડી ઉઠ્યા છે.
