- પોલીસ જવાનોની ભક્તિ અને શ્રદ્ધાનો અદ્ભુત સમન્વય: ડીજેના તાલે અને અબીલ-ગુલાલની છોળો વચ્ચે નીકળી ભવ્ય પગપાળા યાત્રા
- ગુજરાતની સુખ, શાંતિ અને સમૃદ્ધિ માટે મા જગદંબાના ચરણોમાં શીશ ઝુકાવી કરાઈ વિશેષ પ્રાર્થના
પ્રસિદ્ધ યાત્રાધામ ખેડબ્રહ્મા ખાતે ભાદરવી પૂનમના પાવન અવસરે મા જગદંબાના દર્શન માટે માઇભક્તોનું ઘોડાપૂર ઉમટ્યું છે. સમગ્ર મંદિર પરિસર ‘જય અંબે’ અને ‘જય જગદંબા’ના ગુંજતા નાદોથી ભક્તિમય બની ગયું છે. આ દિવ્ય માહોલ વચ્ચે સાબરકાંઠા પોલીસ પરિવાર દ્વારા પણ મા અંબા પ્રત્યેની અપાર શ્રદ્ધા અને ભક્તિ સાથે એક અનોખી મિસાલ કાયમ કરવામાં આવી છે.
ભાદરવી પૂનમના આ પાવન પર્વે ગાંધીનગર રેન્જ IG વીરેન્દ્રસિંહ યાદવ અને સાબરકાંઠા જિલ્લા પોલીસ વડા (SP) ડો. પાર્થરાજસિંહ ગોહિલની વિશેષ ઉપસ્થિતિમાં પોલીસ પરિવાર દ્વારા ભવ્ય ધ્વજારોહણ કરવામાં આવ્યું હતું. આ પાવન અવસરની શરૂઆતમાં સાબરકાંઠા જિલ્લા પોલીસ વડા (SP) ડો. પાર્થરાજસિંહ ગોહિલે ગાંધીનગર રેન્જ IG વીરેન્દ્રસિંહ યાદવનું ભવ્ય ગુલદસ્તો અર્પણ કરીને ઉષ્માભેર સ્વાગત કર્યું હતું. કાયદો અને વ્યવસ્થાની જવાબદારી નિભાવતી પોલીસ જ્યારે ભક્તિના રંગે રંગાય છે, ત્યારે તેનું એક અદ્ભુત દ્રશ્ય ખેડબ્રહ્મામાં જોવા મળ્યું હતું.
ભક્તિના રંગે રંગાયેલી પોલીસ અને શ્રદ્ધાની ભવ્ય પદયાત્રા
સ્થાનિક પોલીસ ચોકીથી લઈને મા અંબિકાના મંદિર સુધી સાબરકાંઠા પોલીસ દ્વારા એક ભવ્ય પગપાળા યાત્રાનું આયોજન કરવામાં આવ્યું હતું. આ યાત્રામાં ગાંધીનગર રેન્જ IG વીરેન્દ્રસિંહ યાદવ અને SP ડો. પાર્થરાજસિંહ ગોહિલની આગેવાની હેઠળ LCB, SOG તેમજ સ્થાનિક પોલીસ સ્ટેશનના તમામ અધિકારીઓ અને વીર જવાનો પૂરી શ્રદ્ધા સાથે હાથમાં પવિત્ર ધજા લઈને જોડાયા હતા.
માર્ગો પર ડીજેના ધબકારા, અબીલ-ગુલાલની છોળો અને ગરબાની રમઝટ વચ્ચે આગળ વધી રહેલા પોલીસ જવાનોના ઉત્સાહે વાતાવરણને વધુ પ્રભાવશાળી બનાવી દીધું હતું. રસ્તામાં આવતા ભક્તોએ પણ પોલીસની આ ભક્તિભાવ ભરેલી ઝાંખીને વધાવી લીધી હતી.
જનકલ્યાણ અને સુરક્ષા માટે મા અંબાના ચરણોમાં પ્રાર્થના
મંદિર પરિસરમાં પહોંચ્યા બાદ શાસ્ત્રોક્ત વિધિ અને સંપૂર્ણ પવિત્રતા સાથે મંદિરના શિખર પર પરંપરાગત ધજા ચડાવવામાં આવી હતી. આ અવસરે સમગ્ર પોલીસ પરિવારે મા જગદંબાના ચરણોમાં શિશ ઝુકાવીને આશીર્વાદ લીધા હતા. આ પ્રસંગે વાત કરતા સાબરકાંઠા જિલ્લા પોલીસ વડા ડો. પાર્થરાજસિંહ ગોહિલે જણાવ્યું હતું કે, "મા અંબાના આશીર્વાદથી સમગ્ર સાબરકાંઠા જિલ્લામાં સુખ, શાંતિ, સમૃદ્ધિ અને ભાઈચારો કાયમ રહે તથા આપણા જિલ્લાના નાગરિકોની સુરક્ષા અને સેવા હંમેશાં અબાધિત જળવાઈ રહે, તેવી દિલથી પ્રાર્થના કરવામાં આવી છે."
ભાદરવી પૂનમના આ મેળામાં વહીવટી અને પોલીસ તંત્રની ઉત્કૃષ્ટ સુરક્ષા વ્યવસ્થા વચ્ચે લાખો ભક્તોએ નિર્ભય બનીને મા અંબાના દર્શનનો લહાવો લીધો હતો, જેનાથી ખેડબ્રહ્માની આ પવિત્ર ભૂમિ આસ્થા અને સુરક્ષાના સંગમ સમાન બની રહી હતી.
