ડીસા તાલુકાના જુનાડીસા ગામમાં ગ્રામ પંચાયતની નવી બિલ્ડિંગના બાંધકામ દરમિયાન પ્રાથમિક આરોગ્ય કેન્દ્રના ક્વાટર્સની સરકારી કમ્પાઉન્ડ દિવાલ કોઈપણ પ્રકારની મંજૂરી વિના તોડી પાડવામાં આવી હોવાનો લોકોમાં ગંભીર આક્ષેપ થયો છે. ઘટનાને આરોગ્ય વિભાગે ગંભીરતાથી લેતાં તાલુકા હેલ્થ ઓફિસરે સંબંધિત પીએચસીને ગ્રામ પંચાયત સામે નિયમ મુજબ કાયદેસરની કાર્યવાહી શરૂ કરવા આદેશ આપ્યો છે. 
ઘટનાની જાણ થતાં તાલુકા હેલ્થ ઓફિસરે સમગ્ર મામલે ગંભીર નોંધ લીધી છે. સંબંધિત પીએચસીના મેડિકલ ઓફિસરને ગ્રામ પંચાયત સામે નિયમસર કાયદેસરની કાર્યવાહી હાથ ધરવા તેમજ સમગ્ર ઘટનાનો અહેવાલ ઉચ્ચ અધિકારીઓને મોકલવા સૂચના આપવામાં આવી છે. આ ઘટનાએ ગ્રામ પંચાયતની કામગીરી સામે અનેક સવાલો ઊભા કર્યા છે. સરકારી મિલકતને નુકસાન પહોંચાડવાના આક્ષેપ વચ્ચે હવે કાયદેસરની કાર્યવાહી કયા તબક્કે પહોંચે છે અને ગ્રામ પંચાયત તરફથી શું સ્પષ્ટતા કરવામાં આવે છે તેના પર સૌની નજર મંડાઈ છે.
આ બાબતે પ્રાથમિક આરોગ્ય કેન્દ્રના સૂત્રોએ જણાવ્યું કે તાલુકા હેલ્થ અધિકારીના આદેશથી રૂબરૂ તપાસમાં સામે આવ્યું છે કે પંચાયત દ્વારા આ ક્વાટર્સની દિવાલ તોડી પાડવામાં આવી છે. જે બાબતની અમે પંચાયતને નોટિસ આપેલી છે ત્યારે માર્ગ અને મકાન વિભાગ દ્વારા અમને પંચાયતનું કામ પૂરું થતાં આ દિવાલને પાછી રીપેરીંગ કરી આપવાની બાયધરી આપવામાં આવી છે. હાલમાં તો આ મુદ્દો આખા ગામમાં ચર્ચાના ચગડોળે ચડ્યો છે.
