ડીસાના સાંઈબાબા મંદિર ખાતે આજે બજરંગ ચેરીટેબલ ટ્રસ્ટ દ્વારા રાજુભાઈ બજરંગની યાદમાં છાશ વિતરણ કેમ્પનું આયોજન કરવામાં આવ્યું હતું. અને અસહ્ય ગરમી વચ્ચે હજારો લોકોને ઠંડી છાશનું વિતરણ કરવામાં આવ્યું હતું.
ડીસા નગરપાલિકાના પૂર્વ સદસ્ય રાજુભાઈ ઠાકોરની ત્રીજી માસિક પુણ્યતિથી નિમિત્તે બજરંગ ચેરીટેબલ ટ્રસ્ટ દ્વારા છાશ વિતરણના કાર્યક્રમનું આયોજન કરવામાં આવ્યું હતું. આ ઉનાળાની અસહ્ય ગરમીમાં બહારથી આવતા લોકોને ગરમીથી રક્ષણ મળે અને શરીરમાં ડીહાયડ્રેશન ના થાય તે માટે ઠંડી મસાલેદાર છાશનું વિતરણ કરવામાં આવ્યું હતું.બપોરના સમયે યોજાયેલા આ છાશ વિતરણ કેમ્પ પર બહારથી આવતા મુસાફરોએ પણ ઠંડી છાશનું સેવન કરીને તાજગીનો અહેસાસ કર્યો હતો. આ કાર્યક્રમ અંતર્ગત હજારોની સંખ્યામાં મુસાફરોને ઠંડી છાશ આપવામાં આવી હતી. આ પ્રસંગે સાઈબાબા ચેરીટેબલ ટ્રસ્ટના સતીશભાઈ પંચાલ, દિનેશભાઈ ટાંક, સ્વર્ગીય રાજુભાઈ ઠાકોરના પરિવારના સભ્યો ઉપસ્થિત રહ્યા હતા.
