મહેસાણાની માનવ આશ્રમ ચોકડી નજીક એક અત્યંત હૃદયદ્રાવક અને ગોજારો અકસ્માત સર્જાયો છે. સ્નેહ ભાવ બંગલોઝ પાસે શાકભાજી વેચીને પોતાનું ગુજરાન ચલાવતા એક પરિવાર પર કાળમુખો ટેમ્પો ફરી વળ્યો હતો. આ દર્દનાક ઘટનામાં એક વર્ષના માસૂમ બાળકનું ઘટનાસ્થળે જ કમકમાટીભર્યું મોત નીપજ્યું હતું, જ્યારે પરિવારના અન્ય ચાર સભ્યો ગંભીર રીતે ઈજાગ્રસ્ત થયા છે.
પ્રાપ્ત વિગતો અનુસાર, મૂળ ચિત્રોડા ગામનો દેવીપૂજક પરિવાર માનવ આશ્રમ ચોકડી પાસે આવેલ સ્નેહ ભાવ બંગલોઝ નજીક બેસીને શાકભાજી વેચી રહ્યો હતો. આ દરમિયાન, માનવ આશ્રમ ચોકડીથી વિસનગર તરફ જઈ રહેલા એક બેકાબૂ ટેમ્પો (ડાલુ) ચાલકે સ્ટીયરીંગ પરથી કાબૂ ગુમાવતા ટેમ્પો સીધો જ આ ગરીબ પરિવાર પર ચડી ગયો હતો. અચાનક બનેલી આ ઘટનાથી સમગ્ર વિસ્તારમાં અરેરાટી વ્યાપી ગઈ હતી. આ જીવલેણ અકસ્માતમાં શિવાંશ આકાશભાઈ દેવીપૂજક નામના માત્ર એક જ વર્ષના માસૂમ બાળકનું ઘટનાસ્થળે જ કમકમાટીભર્યું મોત નીપજ્યું હતું. જ્યારે પરિવારના અન્ય સભ્યો જેમાં બાળકની માતા કાજલબેન, આકાશભાઈની માતા ગીતાબેન, ગીતાબેનના માતા ભીખીબેન જોઈતારામ દેવીપૂજક અને આકાશભાઈના મામા મુકેશભાઈ દેવીપૂજકનો સમાવેશ થાય છે, તેઓને ગંભીર ઈજાઓ પહોંચી હતી.
ઘટનાની જાણ થતાં જ આસપાસના લોકો દોડી આવ્યા હતા અને સ્થાનિક પોલીસ પણ તાત્કાલિક ઘટનાસ્થળે પહોંચી ગઈ હતી. તમામ ઈજાગ્રસ્તોને પ્રાથમિક સારવાર અર્થે તાબડતોબ મહેસાણા સિવિલ હોસ્પિટલમાં ખસેડવામાં આવ્યા હતા. જોકે, મૃતક બાળક શિવાંશની માતા કાજલબેનની હાલત વધુ નાજુક હોવાથી તેમને વધુ સઘન સારવાર માટે અમદાવાદ હોસ્પિટલ ખાતે રિફર કરવાની તજવીજ હાથ ધરવામાં આવી છે. હાલમાં પોલીસે ઘટનાસ્થળે પહોંચીને અકસ્માતનો ગુનો નોંધી આગળની કાયદેસરની કાર્યવાહી શરૂ કરી છે. એક જ પરિવાર પર અણધારી આફત આવી પડતા ચિત્રોડા ગામ અને દેવીપૂજક સમાજમાં શોકનો માહોલ છવાઈ ગયો છે.
