ચાણસ્માની ગર્લ્સ સ્કૂલની કોમ્પ્યુટર લેબમાં શોર્ટ સર્કિટથી આગ, ₹૭ લાખનું નુકસાન

ચાણસ્માની કે.એ.પટેલ ગર્લ્સ હાઈસ્કૂલની કોમ્પ્યુટર લેબમાં મંગળવારે અચાનક શોર્ટ સર્કિટ થવાના કારણે આગ લાગી હતી. આ ઘટનામાં લેબમાં રાખેલા 15 કોમ્પ્યુટર સેટ બળીને ખાખ થઈ જતાં અંદાજે 7 લાખ રૂપિયાનું નુકસાન થયું હોવાનું સ્કૂલ સંચાલકોએ જણાવ્યું હતું. શાળાના સેવક મંગળવારે સવારે 9 વાગ્યાના સુમારે સ્કૂલ ખોલવા આવ્યા ત્યારે કોમ્પ્યુટર લેબ માંથી ધુમાડો નીકળતો જોયો હતો. તેમણે બૂમાબૂમ કરતાં આસપાસના રહેવાસીઓ દોડી આવ્યા હતા. સ્થાનિક લોકોએ શાળાની ફાયર લાઈનનો ઉપયોગ કરીને આગ ઓલવવાનો પ્રયાસ કર્યો હતો.

સેવકે તાત્કાલિક શાળાના આચાર્યને બનાવની જાણ કરી હતી, જેઓ પણ ઘટના સ્થળે દોડી આવ્યા હતા. બાદમાં પાલિકાના ફાયર બ્રિગેડની મદદ લેવામાં આવી હતી અને આગ પર કાબુ મેળવવામાં આવ્યો હતો. આગની જાણ થતાં શાળાના વહીવટદારો પણ સ્થળ પર પહોંચી ગયા હતા. કે.એ. પટેલ ગર્લ્સ હાઈસ્કૂલના આચાર્ય સોનલબેને જણાવ્યું હતું કે, સવારે પટાવાળા બેન શાળાની ઓફિસ ખોલવા આવ્યા ત્યારે કોમ્પ્યુટર લેબમાં ધુમાડા જોવા મળ્યા હતા. ફાયર સેફ્ટી પાઈપલાઈન અને પાલિકાની મદદથી આગ પર કાબુમાં લેવાઈ હતી. લેબમાં રહેલા 15 કોમ્પ્યુટર સેટ બળી જતાં અંદાજે 7 લાખ રૂપિયાનું નુકસાન થયું હોવાનું તેઓએ જણાવ્યું હતું.