ડીસા શહેરમાં ભોંયરામાં ફાયર સેફ્ટીના નિયમોનું પાલન કર્યા વિના ચાલી રહેલા આઇસીયુ મામલે ગુજરાત હાઈકોર્ટે કડક વલણ અપનાવ્યું છે. જસ્ટિસ નિખિલ એસ. કારીયલે સુનાવણી દરમિયાન સ્પષ્ટ શબ્દોમાં જણાવ્યું કે, દર્દીઓના જીવ જોખમમા મુકાતા હોવાથી બિલ્ડિંગ સીલ કરવાની નગરપાલિકાની કાર્યવાહી ૧૦૦ ટકા યોગ્ય અને વ્યાજબી ગણાવી મકાન માલિકની અરજી ફગાવી દીધી હતી.
ડીસાના ડોક્ટર હાઉસ વિસ્તારમાં એક કોમ્પ્લેક્ષના ભોંયરામાં ‘ ICU’ કાર્યરત છે . હોસ્પિટલનું ફાયર સેફ્ટી સર્ટિફિકેટ ૧૪ જુલાઈ, ૨૦૨૫ના રોજ સમાપ્ત થઈ ગયું હોવા છતાં લગભગ એક વર્ષ સુધી તેનું નવીનીકરણ કરવામાં આવ્યું ન હતું. ત્યારબાદ ૫ જુલાઈ, ૨૦૨૬ના રોજ નવીનીકરણ માટે અરજી કરવામાં આવી હતી. કલેક્ટરના આદેશ બાદ ડીસા નગરપાલિકાએ મિલકત સીલ કરવાની નોટિસ આપતા મકાન માલિકે દર્દીઓ દાખલ હોવાનું કારણ દર્શાવી હાઈકોર્ટમાં રાહત માગી હતી. સુનાવણી દરમિયાન કોર્ટે ફાયર સેફ્ટી વિના ભોંયરામાં ICU ચલાવવું અત્યંત જોખમી હોવાનું નોંધ્યું હતું. દર્દીઓને અન્ય હોસ્પિટલમાં ખસેડી શકાય તેમ હોવાથી ફાયર સેફ્ટી વિના કામગીરી ચાલુ રાખવાની મંજૂરી આપી શકાય નહીં, તેમ કોર્ટે સ્પષ્ટ કર્યું હતું.
જ્યારે કોર્ટે ડીસા નગરપાલિકાની કામગીરી પર પણ ગંભીર સવાલો ઉઠાવ્યા હતા. ફાયર NOC પૂર્ણ થયા બાદ આખું વર્ષ સુધી કોઈ કાર્યવાહી કેમ ન થઈ તે અંગે નગરપાલિકાની ઝાટકણી કાઢતાં કોર્ટે કહ્યું હતું કે આવી બેદરકારી સ્વીકાર્ય નથી. પાલિકા દ્વારા સીલ કરવાની કાર્યવાહી કાયદેસર હોઈ પોતાની મિલકતમાં ગેરકાયદેસર પ્રવૃત્તિને આશ્રય આપનાર મકાન માલિક રાહત મેળવવાનો અધિકાર ગુમાવે છે તેમ જણાવી કોર્ટે અરજી ફગાવી સ્પષ્ટ કર્યું કે આ મામલે કોઈપણ પ્રકારની રાહત આપવામાં આવશે નહીં.હાઈકોર્ટના આ નિર્ણયથી ગેરકાયદેસર બાંધકામો, ફાયર સેફ્ટીના ઉલ્લંઘન અને લોકોના જીવ સાથે ચેડાં કરતી પ્રવૃત્તિઓ કરતા તત્વો માં ફફડાટ ફેલાયો છે.
