કાળાબજારી રોકવા અને આઈ-કાર્ડ દ્વારા ઇંધણ આપવા લેખિત રજૂઆત
સરહદી વાવ અને થરાદ વિસ્તારમાં ચાલુ ખેતીની સિઝન દરમિયાન જ ડીઝલની તીવ્ર અછત વર્તાતા ખેડૂતો ભારે આર્થિક અને માનસિક મુશ્કેલીમાં મુકાયા છે. ઇંધણના અભાવે ખેડૂતોના ટ્રેક્ટર અને ખેતીકામ ઠપ થઈ ગયા છે. આ ગંભીર પરિસ્થિતિને ધ્યાને રાખીને ભારતીય કિસાન સંઘ દ્વારા જિલ્લા પુરવઠા અધિકારીને રૂબરૂ મળીને એક લેખિત રજૂઆત પાઠવવામાં આવી છે.
લાઈનોમાં સમય બગડ્યો, કાળાબજારીની ફરિયાદો
કિસાન સંઘે આવેદનમાં જણાવ્યું છે કે, ખેડૂતોએ માત્ર થોડા લીટર ડીઝલ મેળવવા માટે પણ કલાકો સુધી પેટ્રોલ પંપો પર લાંબી કતારોમાં ઉભા રહેવું પડે છે. જેના કારણે તેમનો કિંમતી સમય અને મજૂરી બંને બગડી રહ્યા છે. આ અછતની પરિસ્થિતિનો ગેરફાયદો ઉઠાવીને બજારમાં ઇંધણની કાળાબજારી (બ્લેક માર્કેટિંગ) થતી હોવાની આશંકા અને ફરિયાદો પણ વ્યાપક પ્રમાણમાં ઉઠી છે.
7/12 ના આધારે આઈ-કાર્ડ આપવાની માંગ
ખેડૂતો વતી કિસાન સંઘે પુરવઠા વિભાગ સમક્ષ અનિયમિતતા રોકવા માટે એક મહત્વનો પ્રસ્તાવ મૂક્યો છે. સંઘની માંગ છે કે ખેડૂતોના જમીનના 7/12 અને 8-અ ના ઉતારાના આધારે તેમને એક ચોક્કસ 'આઈ-કાર્ડ' (ઓળખપત્ર) બનાવી આપવામાં આવે, જેથી પંપ સંચાલકો માત્ર સાચા ખેડૂતોને જ પ્રાથમિકતાના ધોરણે અને પૂરતો ડીઝલનો જથ્થો પૂરો પાડે.
અફવાઓથી દૂર રહેવા પુરવઠા અધિકારીની અપીલ
આ રજૂઆત બાદ વાવ-થરાદ જિલ્લા પુરવઠા અધિકારીએ સ્થાનિક જનતા અને ખેડૂતોને શાંતિ જાળવવા અનુરોધ કર્યો છે. તેમણે અપીલ કરતાં જણાવ્યું છે કે, "વિસ્તારમાં ઇંધણનો પૂરતો જથ્થો મળી રહેશે, તેથી કોઈએ પણ બિનજરૂરી રીતે ડીઝલનો સંગ્રહ (સ્ટોક) કરવાની જરૂર નથી. લોકોએ સોશિયલ મીડિયા કે બજારમાં ચાલતી ખોટી અફવાઓથી દૂર રહેવું." તંત્ર દ્વારા સપ્લાય ચેઈનને નિયમિત કરવા માટે પગલાં લેવાઈ રહ્યા હોવાની ખાતરી પણ આપવામાં આવી છે.
