મોટાભાઇની હત્યા કરનાર હત્યારો ભાઈ ઝડપાયો
પાલનપુર તાલુકાના દલવાડા ગામે નાનાભાઈએ જ મોટા ભાઈની હત્યા કરી હોવાની ચકચારી ઘટના સામે આવી હતી. જે કેસમાં ગઢ પોલીસે ગણતરીના કલાકોમાં આરોપી ને ઝડપી લઈ વધુ તપાસ હાથ ધરી છે.
મળતી માહિતી મુજબ, દલવાડા ગામે હીરાભાઈ ચેલાભાઈ ભુટકા અને તેમના મોટા ભાઈ રમેશભાઈ ભુટકા વચ્ચે ખેતરમાં કામ દરમિયાન કોઈ બાબતે બોલાચાલી થઈ હતી. આ બોલાચાલી બાદ મામલો ઉગ્ર બનતા લઘુબંધુ હીરાભાઈએ ગુરુ બંધુ રમેશભાઈના માથા તથા ખભાના ભાગે લોખંડની વાંસીના ઘા મારતા હુમલામાં ગંભીર રીતે ઈજાગ્રસ્ત રમેશભાઈને સારવાર માટે હોસ્પિટલ ખસેડવામાં આવ્યા હતા. જોકે, સારવાર દરમિયાન તેમનું મોત નીપજતાં સમગ્ર પંથકમાં ચકચાર મચી ગઈ હતી. ખેતરમાં સામાન્ય બોલાચાલીથી શરૂ થયેલો વિવાદ હત્યા સુધી પહોંચી જતાં દલવાડા ગામમાં અરેરાટી ફેલાઈ છે.
ફરાર આરોપી ઝડપાયો:ઘટનાસ્થળે રિકન્સ્ટ્રક્શન
બનાવ બાદ ગઢ પોલીસે તપાસ હાથ ધરી હત્યાના આરોપી હીરાભાઈ ચેલાભાઈ ભુટકાની અટકાયત કરી હતી. પોલીસે આરોપીને ઘટનાસ્થળે લઈ જઈ સમગ્ર બનાવનું રિકન્સ્ટ્રક્શન કરાવ્યું હતું. પોલીસ દ્વારા આરોપીની પૂછપરછ તેમજ હત્યા પાછળના ચોક્કસ કારણ સહિતના મુદ્દાઓને લઈ વધુ તપાસ હાથ ધરવામાં આવી રહી છે.
