પાટણ જિલ્લાના સરસ્વતી તાલુકાના ચારૂપ ગામે કેબલ ચોરીની બે ઘટનાઓ સામે આવી છે. અજાણ્યા તસ્કરોએ ગ્રામ પંચાયતના બોર અને એક ખાનગી ખેતરમાંથી કુલ 40,000 રૂપિયાની કિંમતના 80 મીટર કેબલ વાયરની ચોરી કરી છે.
આ ઘટનાઓથી સ્થાનિકોમાં ચિંતા વ્યાપી છે. પ્રથમ બનાવ ચારૂપ ગ્રામ પંચાયતના બોર પર બન્યો હતો. બોર ઓપરેટર વરવાજી અનુપજી ભેમાજી રાજપુતે પોલીસમાં ફરિયાદ નોંધાવી છે. તેમની ફરિયાદ મુજબ, ગત તા. 29 એપ્રિલ, 2026ના રોજ સાંજે 5 વાગ્યાથી 30 એપ્રિલ, 2026ના સવારે 7 વાગ્યા દરમિયાન અજાણ્યા ચોર ઈસમોએ બોર પરથી આશરે 30 મીટર લંબાઈનો કેબલ વાયર કાપી લીધો હતો. આ વાયરની અંદાજિત કિંમત 15,000 રૂપિયા છે.ચોરીનો બીજો બનાવ ચારૂપ ગામની સીમમાં આવેલા સંજયસિંહ ગણપતસિંહ રાજપુતના ખેતરમાં બન્યો હતો. 30 એપ્રિલ, 2026ના રોજ સાંજે 5 વાગ્યાથી 1 મે, 2026ના સવારે 9 વાગ્યાના સમયગાળા દરમિયાન તસ્કરો ખેતરમાં પ્રવેશ્યા હતા. તેમણે બોરની ઓરડીનું તાળું ન હોવાથી અંદર પ્રવેશી આશરે 50 મીટર લંબાઈનો કેબલ વાયર ચોરી લીધો હતો,જેની કિંમત 25,000 રૂપિયા અંદાજવામાં આવી છે. આમ, બે દિવસના ગાળામાં તસ્કરોએ કુલ 40 હજારના કેબલ ચોરીના બનાવને અંજામ આપતા સરસ્વતી તાલુકામાં કેબલ ચોર ગેંગ સક્રિય બની હોવાનો લોકો અહેસાસ કરી રહ્યા છે.
