ગુજરાતમાં કાગળ પર કડક દારૂબંધી હોવા છતાં બુટલેગરોના ગેરકાયદે કાર્યો અટકવાનું નામ નથી લઈ રહ્યા. તાજેતરના લઠ્ઠાકાંડના કાળા પડછાયા વચ્ચે, સાબરકાંઠાના ઈડર પોલીસે દારૂના નેટવર્ક પર મોટી સર્જિકલ સ્ટ્રાઈક કરી છે.
રાજસ્થાનની સરહદેથી ગુજરાતમાં ઘુસાડવામાં આવી રહેલો રૂ. ૨.૭૦ લાખથી વધુનો વિદેશી દારૂનો જથ્થો પોલીસે એક લક્ઝુરિયસ ટાટા હેરિયર કારમાંથી ફિલ્મી ઢબે ઝડપી પાડ્યો છે. બાતમીના આધારે ગ્રામ્ય વિસ્તારમાં ગોઠવાયેલી વોચ દરમિયાન, બે ટુ-વ્હીલર ચાલકો પાયલોટિંગ કરી રહ્યા હોવાનો ચોંકાવનારો ખુલાસો થયો હતો. પોલીસે દારૂ, મોંઘી કાર અને અન્ય સામાન સહિત કુલ રૂ. ૧૪ લાખથી વધુનો મુદ્દામાલ જપ્ત કરી એક આરોપીને દબોચી લીધો છે, જ્યારે ફરાર અન્ય ત્રણ શખ્સોને ઝડપી પાડવા સઘન તપાસ શરૂ કરી છે.
