ચોમાસામાં દરમિયાન લોકોની સુખાકારી જાળવવા પર ભાર મુકાયો
ભાભર નગરપાલિકા ખાતે ગુજરાત સરકારના મંત્રી સ્વરૂપજી ઠાકોરની ઉપસ્થિતિમાં ભાભર નગરપાલિકા ચીફ ઓફિસર પાયલબેન દેસાઈ અને અન્ય અધિકારીઓ સાથે પ્રિ-મોન્સૂન પ્લાનની તૈયારીઓ અંગે મહત્વપૂર્ણ સમિક્ષા બેઠક યોજાઈ હતી. આ બેઠક દરમિયાન વરસાદી પાણીના અસરકારક નિકાલ, શહેરની સફાઈ વ્યવસ્થા, ડ્રેનેજ સિસ્ટમની કામગીરી તેમજ ચોમાસા દરમિયાન નાગરિકોને વધુ સુવિધાઓ અને સગવડો ઉપલબ્ધ કરાવવા સંબંધિત વિવિધ મુદ્દાઓ પર વિસ્તૃત ચર્ચા-વિચારણા કરવામાં આવી હતી.
ભાભર શહેરમાં ચોમાસા દરમિયાન કોઈપણ પ્રકારની શહેરના લોકોને મુશ્કેલી ન સર્જાય અને જનસુવિધાઓ સુચારૂ રીતે ચાલુ રહે તે માટે જરૂરી માર્ગદર્શન અને સૂચનો આપવામાં આવ્યા હતા. નાગરિકોના હિતને કેન્દ્રમાં રાખી તમામ વિભાગોને સમયસર અને અસરકારક કામગીરી કરવા સૂચના આપવામાં આવી હતી. આ બેઠકમાં ભાભર શહેર ભાજપ પ્રમુખ પ્રવિણસિંહ રાઠોડ, ભાભર નગરપાલિકા પ્રમુખ અમરતભાઈ માળી, ઉપપ્રમુખ બલુભા રાઠોડ, સદસ્યો અને ભાજપના વરિષ્ઠ હોદેદારો હાજર રહ્યા હતા.
