એક્ટિવા ચાલક ગંભીર હદે ઇજાગ્રસ્ત
ડીસા-પાલનપુર હાઇવે પર રખડતા પશુઓને કારણે વધુ એક ગંભીર અકસ્માત સર્જાયો છે. ભોયણ પાટીયા નજીકથી એક્ટિવા લઈને ડીસા તરફ આવી રહેલા એક વાહન ચાલક સામે અચાનક આખલો આડો આવી જતાં ગમખ્વાર અકસ્માત સર્જાયો હતો. આ ઘટનામાં એક્ટિવા સવાર રોડ પર પટાકાઈને ફંગોળાતાં તેમને શરીરે ગંભીર ઈજાઓ પહોંચી હતી.ઘટના અંગે આસપાસના લોકોએ તાત્કાલિક ૧૦૮ ઈમરજન્સી એમ્બ્યુલન્સ સેવાને જાણ કરી હતી. સંદેશો મળતાં જ ડીસા ૧૦૮ ની ટીમ સમયસૂચકતા દાખવી ઘટનાસ્થળે દોડી આવી હતી. ૧૦૮ ની ટીમે ઈજાગ્રસ્ત ચાલકને સ્થળ પર જ પ્રાથમિક સારવાર આપી વધુ સારવાર અર્થે તાત્કાલિક હોસ્પિટલ ખસેડ્યા હતા.
આ બનાવને પગલે સ્થાનિકો અને વાહન ચાલકોમાં ભારે અસંતોષ જોવા મળી રહ્યો છે. ડીસા-પાલનપુર હાઇવે પર સતત વધતા જતા રખડતા પશુઓના ત્રાસને કારણે વારંવાર અકસ્માતો સર્જાઈ રહ્યા છે. સ્થાનિક વાહન ચાલકોએ તંત્ર પાસે માંગ કરી છે કે, હાઇવે પર અડિંગો જમાવીને બેસતાં રખડતાં પશુઓ સામે તાત્કાલિક યોગ્ય કામગીરી કરવામાં આવે. જેથી આવા જીવલેણ માર્ગ અકસ્માતો અટકાવી શકાય.
