દિયોદર તાલુકા પંચાયતમાં સરકારી વીજળીથી ખાનગી ઈ-કાર ચાર્જિંગનો વીડિયો વાયરલ

દિયોદર તાલુકા પંચાયત કચેરીમાંથી સરકારી વીજળીના કથિત દુરુપયોગનો ચોંકાવનારો મામલો સામે આવ્યો છે. તાલુકા પંચાયત કચેરીમાં ખાનગી ઈલેક્ટ્રિક કારને સરકારી વીજળીથી ચાર્જ કરવામાં આવી હોવાનો વીડિયો સોશિયલ મીડિયામાં વાયરલ થતાં ચર્ચા જાગી છે. વાયરલ વીડિયોમાં તાલુકા પંચાયત પ્રમુખની ચેમ્બરમાંથી વાયર કાઢીને ખાનગી ઈ-કારનું ચાર્જિંગ કરવામાં આવતું હોવાનો દાવો કરવામાં આવ્યો છે. આ મામલે સરકારી વીજળી અને મિલકતના ઉપયોગને લઈને સવાલો ઉઠી રહ્યા છે. મામલો સામે આવતા TDOએ તાત્કાલિક કાર્યવાહી કરી ગાડીનું ચાર્જર હટાવડાવ્યું હતું. સાથે જ સરકારી વીજળી અને મિલકતના કથિત દુરુપયોગ અંગે સંબંધિત તલાટી કમ મંત્રી સામે તપાસ હાથ ધરી ખાતાકીય કાર્યવાહી કરવાના આદેશ આપવામાં આવ્યા છે. હવે તપાસમાં સરકારી વીજળીનો ખાનગી ઉપયોગ કોની જાણકારીથી કરવામાં આવ્યો હતો અને નિયમોનો ભંગ થયો છે કે નહીં તે સ્પષ્ટ થશે.