વિજયાદશમી (દશેરા)ના પાવન પર્વે શસ્ત્ર પૂજનનું વિશેષ ધાર્મિક અને ઐતિહાસિક મહત્વ રહેલું છે. જેના ભાગરૂપે દર વર્ષની પરંપરા મુજબ આ વર્ષે પણ મોડાસા સ્થિત અરવલ્લી જિલ્લા હોમગાર્ડ કમાન્ડન્ટની કચેરી ખાતે ભક્તિભાવપૂર્વક શસ્ત્ર પૂજન કાર્યક્રમ યોજાયો હતો.
આ પ્રસંગે અરવલ્લી જિલ્લા હોમગાર્ડ કમાન્ડન્ટ દિનેશભાઈ ડી. પટેલની ઉપસ્થિતિમાં રાઈફલ સહિતના વિવિધ શસ્ત્રોનું શાસ્ત્રોક્ત વિધિ-વિધાન અનુસાર પૂજન-અર્ચન કરવામાં આવ્યું હતું. તેમણે કચેરીના તમામ શસ્ત્રોને તિલક કરી પુષ્પ અર્પણ કર્યા હતા.
આ શસ્ત્ર પૂજન કાર્યક્રમમાં જિલ્લા હોમગાર્ડ કચેરીના અધિકારીઓ તેમજ સમગ્ર સ્ટાફ પરિવાર ઉત્સાહભેર જોડાયો હતો અને પરંપરાગત રીતે વિધિ સંપન્ન કરી વિજયાદશમી પર્વની ઉજવણી કરી હતી.
