મહેસાણામાં પર્યાવરણને નુકસાન પહોંચાડતા એક મોટા કૌભાંડનો પર્દાફાશ થયો છે. ખારી નદી પાસે ગેરકાયદેસર રીતે ઝેરી અને દુર્ગંધયુક્ત કેમિકલ ઠાલવતું એક ટેન્કર પોલીસે ઝડપી પાડીને આગળની તપાસ હાથ ધરી છે. આ ઘટના અંગે મહેસાણા બી ડિવિઝનના પીઆઈ એ.આર. પટેલના માર્ગદર્શન હેઠળ સર્વેલન્સ સ્ક્વોર્ડની ટીમ ગુરુવારે મોડી રાત્રે હાઈવે પર નાઈટ રાઉન્ડ પેટ્રોલિંગમાં હતી. આ દરમિયાન ખારી નદી નજીક આવેલા બંધન ગેસ્ટ હાઉસ નીચેની એક દુકાન પાસે શંકાસ્પદ હલચલ જોવા મળી હતી. ત્યાં ઉભેલા એક ટેન્કરમાંથી પાઈપલાઈન દ્વારા દુકાનની આગળ આવેલી પાણીની કુંડીમાં કોઈ પ્રવાહી ઠાલવવામાં આવી રહ્યું હોવાની આશંકા જતા પોલીસે તાત્કાલિક દરોડો પાડ્યો હતો.
પોલીસની ટીમે ઘટનાસ્થળે પહોંચીને તપાસ કરતા 'ડેન્ઝર' લોગો ધરાવતું એક અશોક લેલેન્ડ ટ્રક ટેન્કર (નંબર: GJ-01-JT-3944) મળી આવ્યું હતું. ટેન્કર ચાલક પાછળના ભાગે પાઈપ લગાવીને કુંડીમાં અત્યંત દુર્ગંધયુક્ત અને ઝેરી કેમિકલ જેવું પ્રવાહી ખાલી કરી રહ્યો હતો. પોલીસે તાત્કાલિક પાઈપનો વાલ્વ બંધ કરાવીને અંદાજે ૩૦ હજાર લીટરની ક્ષમતાવાળા આ ટેન્કરની તપાસ કરી હતી, જેમાંથી આશરે ૧૦૦ લીટર જેટલું લીલા રંગનું ડહોળું અને શંકાસ્પદ પ્રવાહી મળી આવ્યું હતું. જેમાં ખારી નદી પાસે, બંધન ગેસ્ટ હાઉસ નીચેની દુકાન પાસે અશોક લેલેન્ડ ટેન્કર GJ-01-JT-3944કે જેમાં લીલા રંગનું, અત્યંત દુર્ગંધયુક્ત અને ઝેરી પ્રવાહી ભરેલું હતું જે ખરી નદીમાં ઠાલવવામાં આવી રહ્યું હતું.
પ્રાથમિક તપાસમાં બહાર આવ્યું છે કે, દુકાન આગળની આ કુંડી સીધી પાણીના નિકાલની લાઈન મારફતે ખારી નદી સાથે જોડાયેલી છે. આ ઝેરી કેમિકલ નદીમાં જતું હોવાથી સ્થાનિક પર્યાવરણ અને જળસ્ત્રોતને મોટું નુકસાન થઈ રહ્યું હતું. આ ગેરકાયદે પ્રવૃત્તિ લાંબા સમયથી ચાલી રહી હોવાની આશંકા સાથે પોલીસે ગુનો નોંધી વધુ તપાસ શરૂ કરી છે. પીઆઈ એ.આર. પટેલે જણાવ્યું હતું કે, જપ્ત કરાયેલા કેમિકલના સેમ્પલ લઈને એફએસએલ (FSL) પરીક્ષણ માટે મોકલવામાં આવશે અને રિપોર્ટ આવ્યા બાદ આ ગુનામાં સંડોવાયેલા તમામ તત્વો સામે કાયદેસરની કડક કાર્યવાહી કરવામાં આવશે.
