સાબરકાંઠા જિલ્લાના મુખ્યાલય હિંમતનગર ખાતે નાગરિકોની સુવિધા માટે ચાલી રહેલા વિકાસકાર્યો અંતર્ગત હિંમતનગર તાલુકામાં સિવિલ સર્કલથી દુર્ગા બજાર સુધી નવનિર્મિત બ્રિજનું કામ પૂરઝડપે ચાલી રહ્યું છે.જે અંતર્ગત આજે રેલવે વિભાગ દ્વારા રેલવે પોર્શનમાં સ્ટીલ ગર્ડરને લોન્ચ કરવાનો બ્લોક બપોરે 12 થી 3 દરમિયાન મહત્વપૂર્ણ કામગીરી પૂર્ણ કરવામાં આવી છે.
બપોરના સમય દરમિયાન રેલવે ટ્રેક LC 82 ઉપર ચાર વિશાળ સ્ટીલ ગર્ડર સફળતાપૂર્વક લોન્ચ કરવામાં આવ્યા હતા. આ ચારેય સ્ટીલ ગર્ડરનું કુલ વજન ૧૨૧ મેટ્રિક ટન છે અને તેની લંબાઈ ૩૭.૨૦૦ મીટરની છે. અત્રે ઉલ્લેખનીય છે કે આ નવનિર્મિત બ્રિજની કુલ લંબાઈ ૬૨૩.૨૦ મીટર અને પહોળાઈ ૭.૫૦ મીટરની છે.
આ અત્યાધુનિક ઓવરબ્રિજનું નિર્માણ પૂર્ણ થવાથી સાબરકાંઠા જિલ્લાના નાગરિકો અને વાહનચાલકોને અવરજવર કરવામાં ભારે સગવડ મળશે તેમજ હિંમતનગર શહેરના મુખ્ય વિસ્તારોમાં વર્ષોથી નડતરરૂપ ટ્રાફિકની સમસ્યાથી કાયમી મુક્તિ મળશે, જેનાથી સ્થાનિક વેપારીઓ અને રાહદારીઓમાં પણ ઉત્સાહ અને આનંદની લાગણી ફેલાઈ છે.
