દિલ્હી એનસીઆરમાં બનાસ ડેરીનો નવો મેગા પ્લાન્ટ બનશે

બનાસકાંઠાના સહકારી મોડેલને સમગ્ર દેશમાં ગૌરવ અપાવનાર બનાસ ડેરીએ હવે રાષ્ટ્રીય સ્તરે સહકારિતાનો વ્યાપ વધારવાની દિશામાં વધુ એક ઐતિહાસિક અને સીમાચિહ્નરૂપ પગલું ભર્યું છે. દિલ્હી એનસીઆરના બાગપત ખાતે બનાસ ડેરી દ્વારા એક અત્યાધુનિક અને વિશાળ દૂધ પ્રોસેસિંગ પ્લાન્ટનું નિર્માણ કાર્ય યુદ્ધના ધોરણે ચાલી રહ્યું છે, જે ઉત્તર ભારતના ખેડૂતો અને પશુપાલકો માટે આર્થિક સમૃદ્ધિના નવા દ્વાર ખોલવા જઈ રહ્યું છે.આ પ્રોજેક્ટ બનાસ ડેરીની રાષ્ટ્રીય ક્ષિતિજો વિસ્તારવાની મહત્વાકાંક્ષી યોજનાનો એક મુખ્ય હિસ્સો છે. આ નવા પ્લાન્ટની સૌથી મોટી વિશેષતા તેની દૈનિક ૧૬ લાખ લીટર દૂધ પ્રોસેસ કરવાની ભવ્ય ક્ષમતા છે. આટલી મોટી માત્રામાં દૂધનું પ્રોસેસિંગ કરવાથી દિલ્હી અને આસપાસના વિસ્તારોમાં દૂધ અને દૂધની બનાવટોની માંગને પહોંચી વળવામાં મોટી મદદ મળશે. પ્લાન્ટનું નિર્માણ કાર્ય હાલ પૂરજોશમાં ચાલી રહ્યું છે, જેથી તેને ટૂંક સમયમાં કાર્યરત કરી શકાય.પ્રોજેક્ટની સફળતા માટે બનાસ ડેરીના ચેરમેન શંકર ચૌધરી સતત કાર્યરત છે. તેમણે તાજેતરમાં જ બાગપત સ્થિત આ પ્લાન્ટની મુલાકાત લીધી હતી અને કામગીરીની પ્રત્યક્ષ સમીક્ષા કરી હતી. પ્રોજેક્ટને નિર્ધારિત સમયમાં પૂર્ણ કરવા માટે તેમણે સ્થળ પર જ જરૂરી સૂચનાઓ અને માર્ગદર્શન પૂરું પાડયું હતું. નેતૃત્વની આ સક્રિયતા દર્શાવે છે કે બનાસ ડેરી માત્ર ગુજરાત પૂરતી સીમિત ન રહેતા, હવે ઉત્તર ભારતના ગ્રામીણ વિકાસમાં પણ મહત્વની ભૂમિકા ભજવવા માટે સંપૂર્ણ સજ્જ છે.