ડીસા તાલુકાના છત્રાલા ગામમાં વિકાસના કામોમાં મોટા પાયે ભ્રષ્ટાચાર આચરવામાં આવ્યા હોવાના આક્ષેપો થયા છે. સીમેન્ટના સીસી રોડ, પેવર બ્લોક અને ગટર લાઇન સહિતના વિવિધ કાર્યોમાં ગેરરીતિ થઈ હોવાની ફરિયાદ ઉઠી છે.
પ્રાથમિક માહિતી મુજબ, છત્રાલા ગામને ફાળવવામાં આવેલી રૂપિયા 11.50 કરોડની ગ્રાન્ટમાંથી કોન્ટ્રાક્ટરો અને અધિકારીઓ દ્વારા ખોટા કામો દર્શાવીને મોટા પાયે ભ્રષ્ટાચાર આચરવામાં આવ્યો છે. ખાસ કરીને, ગામના રબારીવાસ વિસ્તારમાં જૂની ગટર લાઇનનું માત્ર સમારકામ કરીને તેને નવા કામ તરીકે દર્શાવવામાં આવી છે. આ રીતે ગટર લાઇનના કામમાં ગેરરીતિ આચરવામાં આવી હોવાનું સામે આવ્યું છે. આ મામલે ડીસા તાલુકા વિકાસ અધિકારી (TDO) દ્વારા ગામની મુલાકાત લેવામાં આવી હતી. તેમણે ગામમાં થયેલા વિકાસકાર્યોનું સ્થળ નિરીક્ષણ કરીને ગેરરીતિના આક્ષેપોની તપાસ શરૂ કરી છે. છત્રાલા ગામમાં વિકાસના કામોમાં થયેલી આ મોટા પાયે ગેરરીતિ અંગે સઘન તપાસ કરવામાં આવે તેવી ગ્રામજનો દ્વારા માંગ ઉઠી છે.
