ડીસા નજીક વરણ ગામની સીમની ઝાડીઓમાંથી જીવંત નવજાત શિશુ મળી આવતા ચકચાર

અજાણી માતા વિરુદ્ધ લોકોએ ફીટકાર વરસાવ્યો; ડીસા તાલુકાના વરણ ગામની સીમમાં આવેલી ઝાડીઓમાંથી તાજુ જન્મેલું એક જીવંત બાળક મળી આવતા સમગ્ર પંથકમાં ચકચાર મચી ગઈ છે. અમાનવીય કૃત્ય આચરનાર માતા પ્રત્યે લોકોમાં ભારે ફીટકાર જોવા મળી રહ્યો છે. મળતી માહિતી મુજબ, વરણ ગામની સીમમાં ઝાડીઓમાં કોઈ અજાણી વ્યક્તિ દ્વારા તાજુ જન્મેલું બાળક ફેંકી દેવામાં આવ્યું હતું. સ્થાનિક લોકોને આ બાળકની જાણ થતાં તાત્કાલિક 108 એમ્બ્યુલન્સને જાણ કરવામાં આવી હતી. 108 ની ટીમે ઘટનાસ્થળે પહોંચી જીવંત બાળકને પ્રાથમિક સારવાર આપી વધુ સારવાર અર્થે ડીસા સિવિલ હોસ્પિટલમાં ખસેડ્યું હતું. સિવિલ હોસ્પિટલના સત્તાવાળાઓ દ્વારા આ અંગે ડીસા રૂરલ પોલીસને જાણ કરવામાં આવી છે. પોલીસે આ મામલે વધુ તપાસ હાથ ધરી છે અને બાળકને ત્યજી દેનાર માતાને શોધી કાઢવા પ્રયાસો શરૂ કર્યા છે. આ ઘટનાને પગલે બાળકને જન્મ આપી તરછોડી દેનાર જનેતા પ્રત્યે લોકોમાં ભારે રોષ અને ફીટકારની લાગણી જોવા મળી રહી છે.