ભૂટાનના રાજા મહાકુંભ પહોંચ્યા, ત્રિવેણી સંગમમાં પવિત્ર ડૂબકી લગાવી

શ્રદ્ધાના વિવિધ રંગોને સમાવિષ્ટ કરતા પવિત્ર શહેર પ્રયાગરાજમાં મહાકુંભમાં આજે વિદેશી મહેમાનોનું આગમન થયું છે અને મુખ્યમંત્રી યોગી આદિત્યનાથ તેમનું સ્વાગત કરી રહ્યા છે. ભૂટાનના રાજા જિગ્મે ખેસર નામગ્યેલ વાંગચુકે આજે સંગમમાં ડૂબકી લગાવી. આ દરમિયાન સીએમ યોગી પણ તેમની સાથે હતા. આ પહેલા ભૂટાનના રાજા અને સીએમ યોગીએ સંગમ કિનારે વિધિ મુજબ પૂજા કરી હતી. તે બંને કબૂતરોને અનાજ ખવડાવતા પણ જોવા મળ્યા. ભૂટાનના રાજા જિગ્મે ખેસર નામગ્યેલ વાંગચુક સોમવારે લખનૌ પહોંચ્યા. ચૌધરી ચરણસિંહ આંતરરાષ્ટ્રીય વિમાનમથક પર મુખ્યમંત્રી યોગી આદિત્યનાથે વાંગચુકનું સ્વાગત કર્યું. વાંગચુક મંગળવારે મહાકુંભમાં ભાગ લેવા માટે પ્રયાગરાજ આવ્યા છે. સીએમ યોગીએ ભૂટાનના રાજાને પુષ્પગુચ્છ અર્પણ કર્યો અને તેમના ખબરઅંતર પૂછ્યા. ભૂટાનના રાજાએ પણ મુખ્યમંત્રીનું સ્વાગત કર્યું. એરપોર્ટ પર કલાકારોએ ભૂટાનના રાજા માટે વિવિધ સાંસ્કૃતિક કાર્યક્રમો રજૂ કર્યા. આ દરમિયાન વાંગચુકે કલાકારોને પણ પ્રોત્સાહન આપ્યું.