ઈકબાલગઢ: ભંગારના ગોડાઉનમાં આગ, ફાયર સુવિધા ન મળતા ભારે નુકસાન

બનાસકાંઠા જિલ્લાના ઈકબાલગઢમાં આવેલા એક ભંગારના ગોડાઉનમાં અચાનક ભીષણ આગ ફાટી નીકળતાં સમગ્ર વિસ્તારમાં અફરાતફરીનો માહોલ સર્જાયો હતો. આગની તીવ્રતા જોઈને સ્થાનિક લોકો તાત્કાલિક ઘટનાસ્થળે દોડી આવ્યા હતા અને ફાયર ફાઈટરની રાહ જોયા વિના જીવના જોખમે પાણીનો મારો ચલાવી આગ પર કાબૂ મેળવવાનો પ્રયાસ કર્યો હતો. સ્થાનિક સ્તરે ફાયર બ્રિગેડની સુવિધા ઉપલબ્ધ ન હોવાને કારણે આગને સમયસર કાબૂમાં ન લઈ શકાઈ, જેના લીધે ગોડાઉનમાં રાખેલો લાખો રૂપિયાનો મુદ્દામાલ બળીને ખાખ થઈ ગયો હતો. આ ઘટનાને પગલે સ્થાનિક તંત્ર સામે ફાયર સુવિધાના અભાવ મુદ્દે ગ્રામજનોમાં ભારે આક્રોશ જોવા મળી રહ્યો છે.