ગ્રામજનો અને પશુપાલકોના ચેરમેન અને મંત્રી સામે ગેરરીતિઓના ગંભીર આક્ષેપો
ડીસા તાલુકાના મોરથલ-ગોળીયા ગામની દૂધ ઉત્પાદક સહકારી મંડળીની વાર્ષિક સામાન્ય સભા વિવાદનું કેન્દ્ર બની છે. ગ્રામજનો અને પશુપાલકોએ મંડળીના ચેરમેન અને મંત્રી પર મનસ્વી નિર્ણયો લેવા, પારદર્શિતાનો અભાવ અને હિસાબી ગેરરીતિઓના ગંભીર આક્ષેપો કર્યા છે.
એક ગ્રામજને સભાની વિગતો આપતા જણાવ્યું હતું કે,સાડા સાત વાગ્યે મેસેજ મૂક્યો અને સવારે નવ વાગ્યે સભા હતી. મંત્રી અને ચેરમેને સભામાં આવીને કહ્યું કે, સાહેબને કામ છે અને તેઓ આવવાના નથી, તેથી સભા મૌખિક રાખો. માત્ર આટલું કહીને આખી કમિટી તત્કાલ ત્યાંથી રવાના થઈ ગઈ હતી. આ લોકો પહેલેથી જ મન બનાવીને બેઠા હતા.ગ્રામજનોનો વધુમાં આક્ષેપ છે કે બે વર્ષ પહેલાં ગામના વડીલોએ જે વ્યક્તિઓની નિમણૂક કરી હતી, તેમને પડતા મૂકીને પોતાના મળતિયાઓને કમિટીમાં સ્થાન આપી દેવાયું છે. મનસ્વી રીતે કરાયેલી આ નિયુક્તિઓ સામે ગ્રામજનોમાં ભારે નારાજગી જોવા મળી રહી છે.
આ સમગ્ર મામલે ડેરીના હોદ્દેદારો દ્વારા હજુ સુધી કોઈ સત્તાવાર ખુલાસો કરવામાં આવ્યો નથી. મંડળીની કાર્ય પદ્ધતિ પર ઉઠેલા આ ગંભીર સવાલો બાદ હવે બનાસ ડેરીના જવાબદાર અધિકારીઓ શું પગલાં લે છે અને આ મામલે કોઈ નિષ્પક્ષ તપાસ થાય છે કે કેમ ? તે જોવું રહ્યું.
