શિહોરી-થરા હાઈવે પર ટેલર પાછળ કાર ઘૂસી

બનાસકાંઠાના શિહોરી-થરા નેશનલ હાઈવે પર કાંકરેજના ડુંગરાસણ બસસ્ટેન્ડ પાસે એક ગમખ્વાર અકસ્માત સર્જાયો હતો. એક કાર ટેલરની પાછળ ઘૂસી જતાં કારનો આગળનો ભાગ સંપૂર્ણપણે ક્ષતિગ્રસ્ત થઈ ગયો હતો. જોકે, આ ગંભીર અકસ્માતમાં કાર ચાલકનો આશ્ચર્યજનક રીતે બચાવ થયો હતો.પ્રાથમિક માહિતી અનુસાર, આ ઘટના ડુંગરાસણ બસસ્ટેન્ડ નજીક બની હતી. કાર ટેલરની પાછળ એટલી જોરથી અથડાઈ હતી કે તેનો આગળનો ભાગ સંપૂર્ણપણે કચડાઈ ગયો હતો, જે અકસ્માતની ભયાનકતા દર્શાવે છે.અકસ્માત થતાં જ ઘટનાસ્થળે લોકોના ટોળા ઉમટી પડ્યા હતા. સ્થાનિક લોકોએ ભારે જહેમત ઉઠાવીને ક્ષતિગ્રસ્ત કારમાંથી ડ્રાઈવરને બહાર કાઢ્યો હતો. ત્યારબાદ, 108 એમ્બ્યુલન્સની મદદથી ઈજાગ્રસ્ત ડ્રાઈવરને શિહોરી રેફરલ હોસ્પિટલમાં ખસેડવામાં આવ્યો હતો.આટલી ગંભીર ટક્કર છતાં ડ્રાઈવરને માત્ર સામાન્ય ઈજાઓ પહોંચી હતી, જે એક રાહતની વાત છે. કાર ચાલકની ઓળખ ઓગડ તાલુકાના તાણા ગામના પુરોહિત નિલેશભાઈ બાબુભાઈ તરીકે થઈ છે.