હાલના સમયમાં જાહેર જનતાના મોબાઈલ ફોન ગુમ થવાના, પડી જવાના કે ખોવાઈ જવાના બનાવોમાં વધારો થતાં, બનાસકાંઠા રેન્જ પોલીસ મહાનિરીક્ષક શ્રીમતી પરીક્ષિતા રાઠોડ તથા બનાસકાંઠા જિલ્લા પોલીસ અધિક્ષક પ્રશાંત સુંબે દ્વારા અરજદારોના ખોવાયેલા મોબાઈલ શોધી પરત અપાવવા અંગે ખાસ સૂચનાઓ આપવામાં આવી હતી. આ સૂચના અન્વયે, નાયબ પોલીસ અધિક્ષક (ડીસા વિભાગ) સી.એલ. સોલંકી તથા ડીસા ઉત્તર પોલીસ સ્ટેશનના પોલીસ ઇન્સ્પેક્ટર એ.આર.ખત્રીના માર્ગદર્શન હેઠળ ડીસા ઉત્તર પોલીસ સ્ટેશનની ટીમ દ્વારા હાથ ધરાયેલી કામગીરીમાં સફળતા મળી છે.
ડીસા શહેર ઉત્તર પોલીસ સ્ટેશન વિસ્તારમાંથી અલગ-અલગ અરજદારોના ગુમ થયેલા કે ખોવાયેલા મોબાઈલ અંગે મળેલી અરજીઓના આધારે, ટેકનિકલ સર્વેલન્સ, પોર્ટલ તેમજ હ્યુમન સોર્સિંગની મદદથી પોલીસે સઘન તપાસ ચલાવી હતી. આ સફળ કામગીરીના પરિણામે પોલીસે કુલ રૂ. ૫૪,૦૦૦/- ની કિંમતના ૩ મોબાઈલ ફોન શોધી કાઢ્યા હતા.
આ શોધી કાઢવામાં આવેલા મોબાઈલ ફોન “તેરા તુજકો અર્પણ” કાર્યક્રમ અંતર્ગત મૂળ માલિકોને પરત સોંપવામાં આવ્યા છે.પોલીસની આ સરાહનીય અને પ્રશંસનીય કામગીરી બદલ મોબાઈલ માલિકો તથા સ્થાનિક જનતાએ બનાસકાંઠા પોલીસનો હૃદયપૂર્વક આભાર માન્યો હતો.
