સત્તાધીશોની સમજાવટ બાદ હડતાલ સમેટાઈ
પાલનપુરની બનાસ જનરલ હોસ્પિટલમાં પગાર સંબંધિત પ્રશ્નોને લઈને વર્ગ-4ના કર્મચારીઓએ હડતાલ પાડી વિરોધ નોંધાવ્યો હતો. પગારને લગતા પ્રશ્નોનો વહેલી તકે ઉકેલ લાવવામાં આવે તેવી માંગ સાથે કર્મચારીઓ કામગીરીથી અળગા રહ્યા હતા.
વર્ગ-4ના કર્મચારીઓ હડતાલ પર ઉતરતાં હોસ્પિટલની કામગીરી પર અસર થવાની સ્થિતિ સર્જાઈ હતી. ઘટનાની જાણ હોસ્પિટલના સત્તાધીશોને થતાં તેઓ તાત્કાલિક ઘટના સ્થળે દોડી આવ્યા હતા. અને હડતાલ પર ઉતરેલા કર્મચારી ઓ સાથે બેઠક યોજી હતી.
બેઠક દરમિયાન કર્મચારીઓના પગાર સંબંધિત પ્રશ્નો અંગે ચર્ચા કરવામાં આવી હતી. સત્તાધીશોએ કર્મચારીઓને તેમના પ્રશ્નો અંગે યોગ્ય કાર્યવાહી કરવાની ખાતરી આપી હતી. તેમજ આગામી 1 તારીખ સુધીમાં પગાર સંબંધિત સમસ્યાનો ઉકેલ લાવવાની ખાતરી આપતાં કર્મચારીઓએ હડતાલ સમેટી લીધી હતી. હડતાલ સમેટાયા બાદ બનાસ જનરલ હોસ્પિટલમાં કર્મચારીઓ ફરી કામગીરીમાં જોડાયા હતા. અને હોસ્પિટલની સેવાઓ રાબેતા મુજબ શરૂ થઈ હતી.
