પોલીસ દ્વારા હુમલાખોરોને ઝડપવાના ચક્રો ગતિમાન
બનાસકાંઠા જિલ્લાના ડીસા શહેરમાંથી એક ચોંકાવનારા સમાચાર સામે આવ્યા છે. ડીસાના દીપક હોટલ સર્કલ પાસે પશુઓની ગેરકાયદેસર હેરાફેરી અટકાવવા ગયેલા જીવદયા પ્રેમીઓ પર કેટલાક અસામાજિક તત્વો દ્વારા જીવલેણ હુમલો કરવામાં આવતા સમગ્ર પંથકમાં ચકચાર મચી ગઈ છે. આ ઘટનાને પગલે સ્થાનિકો અને જીવદયા પ્રેમીઓમાં ભારે આક્રોશ જોવા મળી રહ્યો છે.
મળતી માહિતી મુજબ, ડીસાના દીપક હોટલ સર્કલ પાસેથી પશુઓની ક્રૂરતાપૂર્વક અને ગેરકાયદેસર હેરાફેરી થઈ રહી હોવાની આશંકાના આધારે સ્થાનિક જીવદયા પ્રેમીઓ ત્યાં પહોંચ્યા હતા. અને પશુ ભરેલા વાહનોને અટકાવવાનો પ્રયાસ કરતા જ, પશુઓની હેરાફેરી કરતા અસામાજિક શખ્સો ઉશ્કેરાઈ ગયા હતા. તેમણે એક સંપ થઈને જીવદયા પ્રેમીઓ પર લાકડીઓ અને અન્ય હથિયારો વડે ઘાતક હુમલો કરી દીધો હતો.આ હુમલામાં કેટલાક જીવદયા પ્રેમીઓને ગંભીર ઇજાઓ પહોંચી હોવાના અહેવાલ છે. ઘટના બનતા જ આસપાસના લોકો એકઠા થઈ ગયા હતા અને ઇજાગ્રસ્તોને તાત્કાલિક સારવાર અર્થે ડીસાની સિવિલ હોસ્પિટલ ખાતે ખસેડવામાં આવ્યા છે, જ્યાં હાલ તેમની સારવાર ચાલી રહી છે.
મૂંગા પશુઓનો જીવ બચાવવા માટે સતત કાર્યરત રહેતા જીવદયા પ્રેમીઓ પર આ પ્રકારે સરાજાહેર હુમલો થતાં જ અન્ય જીવદયા સંગઠનો અને ગૌભક્તોમાં ભારે રોષ ફાટી નીકળ્યો છે. જીવદયા પ્રેમીઓએ આ ઘટનાને સખત શબ્દોમાં વખોડી કાઢી છે અને હુમલો કરનારા તમામ શખ્સો સામે તાત્કાલિક કડકમાં કડક કાનૂની કાર્યવાહી કરવામાં આવે તેવી માંગ કરી છે.પોલીસે આ મામલે ગુનો નોંધીને આગળની તપાસ અને હુમલાખોરોને ઝડપી પાડવા માટેના ચક્રો ગતિમાન કર્યા છે.
