ડીસા તાલુકા ખરીદ વેચાણ સંઘના ચેરમેન અને વાઇસ ચેરમેન પદ માટેની ચૂંટણી આજે નાયબ કલેક્ટરના અધ્યક્ષ સ્થાને યોજાઈ ગઈ હતી. જેમાં ભાજપના મેન્ડેટ મુજબ ચેરમેન તરીકે ડીસા તાલુકા પંચાયતના પૂર્વ પ્રમુખ ઉકાજી ઠાકોર અને વાઇસ ચેરમેન તરીકે યુવા ડિરેક્ટર અરવિંદ દેસાઈની સર્વાનુમતે વરણી કરવામાં આવી છે.તાલુકા ખરીદ વેચાણ સંઘની આ મહત્ત્વની ચૂંટણીને લઈને ભાજપ પ્રદેશ સંગઠન દ્વારા ચેરમેન અને વાઇસ ચેરમેન નામો અંગેનો મેન્ડેટ જાહેર કરવામાં આવ્યો હતો. ચૂંટણી પ્રક્રિયા દરમિયાન ભાજપ દ્વારા આપવામાં આવેલ મેન્ડેટ મુજબ જ દાવેદારોએ ઉમેદવારી નોંધાવતા ચૂંટણી અધિકારી અને નાયબ કલેક્ટરની હાજરીમાં બંને હોદ્દેદારોને બિનહરીફ વિજેતા જાહેર કરવામાં આવ્યા હતા.
આ પ્રંસગે પૂર્વ ધારાસભ્ય શશિકાન્ત પંડ્યા, પ્રતિકભાઈ પઢીયાર, વિપુલભાઈ દવે, સુમેરસીહ વાઘેલા સહિત ભાજપ હોદેદારો ઉપસ્થિત રહ્યા હતા. આજે ચેરમેન પદે ચૂંટાયેલા ઉકાજી ઠાકોર અને વાઇસ ચેરમેન અરવિંદ દેસાઈની વરણી થતાં જ ખરીદ વેચાણ સંઘના હોલ ખાતે સહકારી ક્ષેત્રના આગેવાનો અને ભાજપના કાર્યકરોમાં ભારે ઉત્સાહ જોવા મળ્યો હતો. ઉપસ્થિત આગેવાનોએ બંને નવનીયુક્ત હોદ્દેદારોને પુષ્પગુચ્છ આપી મોં મીઠું કરાવી અભિનંદન પાઠવ્યા હતા.આ પ્રસંગે નવનિયુક્ત ચેરમેન ઉકાજી ઠાકોર અને વાઇસ ચેરમેન અરવિંદ દેસાઈએ સંઘના માધ્યમથી તાલુકાના ખેડૂતો અને સહકારી ક્ષેત્રના હિતમાં પારદર્શકતાથી કામ કરવાની ખાતરી આપી હતી.
