બનાસકાંઠાના વેપારી મથક ડીસા જી.આઈ.ડી.સી. (GIDC) માંથી ગઈકાલે બે જાણીતા વેપારીઓનું બોગસ પોલીસ બની આવેલા શખ્સો દ્વારા અપહરણ કરવામાં આવતા સમગ્ર પંથકમાં ચકચાર મચી ગઈ છે. આ ઘટનામાં ડીસાના સ્થાનિક લેભાગુ પત્રકારની સંડોવણી પણ બહાર આવી છે. બનાવ અંગે ડીસા તાલુકા પોલીસ મથકે ૭ લોકો વિરુદ્ધ ગુનો નોંધાતા પોલીસે વધુ તપાસ હાથ ધરી છે. મળતી માહિતી મુજબ, ડીસા GIDC માંથી પરેશ મોદી અને જીગ્નેશ મોદી નામના બે વેપારીઓનું બે ગાડીઓમાં આવેલા અજાણ્યા ૬ શખ્સોએ અપહરણ કર્યું હતું. અપહરણકર્તાઓએ પોતાની ઓળખ ગાંધીનગર ક્રાઈમ બ્રાન્ચના અધિકારી તરીકે આપી હતી અને મોબાઈલ ફોનમાં પોલીસનું આઈ-કાર્ડ બતાવી બંને વેપારીઓને બળજબરીપૂર્વક ગાડીમાં બેસાડી દીધા હતા.
ત્યારબાદ અપહરણકર્તાઓ બંને વેપારીઓને ગાંધીનગર તરફ લઈ ગયા હતા. અને મુક્તિના બદલામાં ₹૫૦ લાખની તોતિંગ ખંડણીની માંગણી કરી હતી. જોકે, બાદમાં અપહરણકર્તાઓ બંને વેપારીઓને અડાલજ ચોકડી નજીક ઉતારીને ત્યાંથી ફરાર થઈ ગયા હતા તે દરમિયાન આ સમગ્ર ષડયંત્રમાં ડીસાના જગતસિંહ સોલંકી નામના એક લેભાગુ પત્રકારની સંડોવણી હોવાનું સામે આવ્યું છે. અપહરણનો ભોગ બનેલા વેપારીએ આ અંગે ડીસા તાલુકા પોલીસ મથકે ફરિયાદ નોંધાવતા પોલીસે પત્રકાર જગતસિંહ સોલંકી સહિત કુલ ૭ શખ્સો સામે ગુનો નોંધી તેમની ધરપકડ માટે ચક્રો ગતિમાન કર્યા છે.
