અમદાવાદની હાઈ-સિક્યોરિટી ગણાતી સાબરમતી સેન્ટ્રલ જેલ ફરી એકવાર વિવાદમાં આવી છે. જેલના 'બડા ચક્કર' વિસ્તારમાં સામાન્ય બાબતે શરૂ થયેલી બોલાચાલીએ હિંસક સ્વરૂપ ધારણ કર્યું હતું. આ ઘટનામાં એક કેદીને ગંભીર ઈજાઓ પહોંચતા તેને તાત્કાલિક સારવાર માટે સિવિલ હોસ્પિટલ ખસેડવામાં આવ્યો છે.
છેલ્લા 5 માસથી જેલમાં સજા કાપી રહેલા 35 વર્ષીય સંજય રમેશભાઈ રાઠોડે આ મામલે ફરિયાદ નોંધાવી છે. ઘટના ગતના રોજ બપોરે 4:00 થી 4:15 વાગ્યાની આસપાસ બની હતી. સંજયે પોતાની દાઢી અને મૂછો કઢાવી નાખી હોવાથી, સાથી કેદી સમીરે તેની મજાક ઉડાવી ઉશ્કેરણીજનક શબ્દો કહ્યા હતા. સમીરે 'તું બાયલા હૈ' કહીને સંજયનું અપમાન કર્યું હતું.
જ્યારે સંજયે આ અપમાનજનક ટિપ્પણીનો વિરોધ કર્યો, ત્યારે મામલો બિચક્યો હતો. ઉશ્કેરાયેલા સમીરે ગાળાગાળી કરી સંજયને જોરદાર લાફો ઝીંકી દીધો હતો. ત્યારબાદ બંને વચ્ચે થયેલી ઝપાઝપીમાં સમીરે સંજયને નીચે પાડી દઈને ઢોર માર માર્યો હતો. આ હુમલામાં સંજયના હાથમાં ફ્રેક્ચર જેવી ગંભીર ઈજાઓ થઈ હોવાનું જાણવા મળ્યું છે. જેલ પ્રશાસને તાત્કાલિક દખલગીરી કરી મામલો થાળે પાડ્યો હતો અને હુમલાખોર કેદી વિરુદ્ધ કાયદેસરનો ગુનો નોંધી વધુ તપાસ હાથ ધરી છે. જેલની અંદર વધતી જતી આવી ઘટનાઓ સુરક્ષા વ્યવસ્થા સામે પ્રશ્નાર્થ ચિહ્નો ઉભા કરે છે.
