ભરૂચ જિલ્લાના ઝઘડિયાના GIDC વિસ્તારમાં આવેલી મેટ્રોપોલિટન એક્ઝેમ નામની કંપનીમાં ભીષણ આગ લાગી હતી, જેમાં જોરદાર વિસ્ફોટ થયો હતો. સમગ્ર વિસ્તારમાં ભયનો માહોલ છવાઈ ગયો હતો. વિસ્ફોટનો અવાજ દૂર દૂર સુધી સંભળાયો હતો, જેના કારણે રહેવાસીઓમાં ગભરાટ ફેલાઈ ગયો હતો. આગની માહિતી મળતાં જ ફાયર બ્રિગેડના અનેક ટેન્ડરો તાત્કાલિક ઘટનાસ્થળે પહોંચી ગયા હતા અને આગને કાબુમાં લેવા માટે બચાવ અને રાહત કામગીરી શરૂ કરી હતી.
પ્રાથમિક માહિતી મુજબ, અકસ્માતમાં કેટલાક કામદારો ઘાયલ થયા છે. ઘાયલોને સારવાર માટે નજીકની હોસ્પિટલમાં દાખલ કરવામાં આવ્યા છે. આગ એટલી તીવ્ર હતી કે ધુમાડાના ગોટેગોટા દૂર દૂર સુધી દેખાઈ રહ્યા હતા. હાલમાં આગ પર કાબુ મેળવવાના પ્રયાસો ચાલી રહ્યા છે, અને વિસ્ફોટનું કારણ હજુ સુધી જાણી શકાયું નથી. પોલીસ અને વહીવટીતંત્ર પણ ઘટનાસ્થળે પહોંચી ગયા છે અને મામલાની તપાસ કરી રહ્યા છે.
