ડીસા રૂરલ પોલીસ સ્ટેશન વિસ્તારના જુનાડીસા ગામમાં આવેલા નવાપુરા વિસ્તારમાં પોલીસે બાતમીના આધારે દરોડો પાડીને બંધ મકાનમાંથી વિદેશી દારૂનો મોટો જથ્થો ઝડપી પાડ્યો છે. પોલીસે સ્થળ પરથી કુલ 960 બોટલ અને ટીનનો જથ્થો કબજે કરી કાયદેસરની કાર્યવાહી હાથ ધરી છે.
ડીસા રૂરલ પોલીસની ટીમ પેટ્રોલિંગમાં હતી તે દરમિયાન મળેલી બાતમીના આધારે જુનાડીસા ગામના નવાપુરા વિસ્તારમાં આવેલા બે બંધ મકાનોમાં દરોડો પાડવામાં આવ્યો હતો.તે દરમિયાન આ મકાનોમાંથી ભારતીય બનાવટના વિદેશી દારૂ અને બીયરની નાની-મોટી બોટલો તેમજ ટીન મળી કુલ 960 નંગ જથ્થો મળી આવ્યો હતો. જેની અંદાજિત કિંમત 2,61,504 રૂપિયા થવા જાય છે.
પોલીસની પ્રાથમિક તપાસમાં બહાર આવ્યું હતું કે જુનાડીસા ખાતે રહેતો અજયજી કેશાજી ઠાકોર આ મકાનોમાં દારૂનો જથ્થો રાખી છૂટક વેચાણ કરતો હતો. દરોડા દરમિયાન આરોપી હાજર મળી આવ્યો ન હતો, જેથી પોલીસે તેની વિરુદ્ધ પ્રોહિબિશન હેઠળ ગુનો નોંધીને વધુ તપાસ હાથ ધરી છે.
