IPLમાં દિલ્હી કેપિટલ્સ અને સ્થાનિક ક્રિકેટમાં બંગાળ તરફથી રમતા ક્રિકેટર અભિષેક પોરેલની પોલીસે ધરપકડ કરી છે. મેડિકલની એક વિદ્યાર્થીનીએ તેના પર લગ્નનું ખોટું વચન આપીને બળાત્કાર, હુમલો અને જાનથી મારી નાખવાની ધમકી આપવાનો આરોપ લગાવ્યો છે. પોલીસના જણાવ્યા અનુસાર, દમ દમ વિસ્તારના ઇમામી સિટીમાં ક્રિકેટરને અટકાયતમાં લેવામાં આવ્યો હતો. જિલ્લા પોલીસ અધિક્ષકે ધરપકડની પુષ્ટિ કરી છે.
પોલીસના જણાવ્યા અનુસાર, ક્રિકેટર અભિષેક પોરેલ વિરુદ્ધ ભારતીય દંડ સંહિતા (IPC) અને IT એક્ટની અનેક ગંભીર કલમો હેઠળ કેસ નોંધવામાં આવ્યો છે. ફરિયાદી મહિલાનું કહેવું છે કે તેઓ છેલ્લા ત્રણ વર્ષથી રિલેશનશિપમાં હતા, પરંતુ ગયા વર્ષે તેમની વચ્ચે અણબનાવ થયો. ત્યારબાદ અભિષેકે તેનાથી દૂરી બનાવી લીધી. મહિલાનો આરોપ છે કે પોરેલે લગ્નના ખોટા વચનો આપીને તેની સાથે શારીરિક સંબંધ બાંધ્યા હતા, પરંતુ બાદમાં તેણે તેની સાથે લગ્ન કરવાનો ઇનકાર કરી દીધો હતો. વધુમાં, મહિલાએ ક્રિકેટર વિરુદ્ધ હુમલો અને જાનથી મારી નાખવાની ધમકીના ગંભીર આરોપો પણ લગાવ્યા છે.
કોલકાતા હાઈકોર્ટના આદેશ બાદ, પોલીસે ક્રિકેટર અભિષેક પોરેલની ધરપકડ કરી છે. કોલકાતા હાઈકોર્ટે થોડા દિવસ પહેલા ધરપકડનો આદેશ આપ્યો હતો . પોલીસ અધિકારીઓના જણાવ્યા અનુસાર, ફરિયાદ બાદ તપાસ શરૂ કરવામાં આવી હતી, જેના કારણે આ કાર્યવાહી કરવામાં આવી હતી. પોલીસ અધિક્ષક (એસપી) એ પણ ધરપકડની પુષ્ટિ કરી છે. અભિષેક પોરેલે પહેલાથી જ તેમના પરના તમામ આરોપોને સંપૂર્ણપણે નકારી કાઢ્યા છે.
મેડિકલ સ્ટુડન્ટે બળાત્કારનો આરોપ લગાવ્યા બાદ દિલ્હી કેપિટલ્સ વિકેટકીપર અભિષેક પોરેલની ધરપકડ
