ક્રિકેટમાં જ્યારે પણ ભારત અને પાકિસ્તાન સામસામે આવે છે, ત્યારે મેચનો ઉત્સાહ આપમેળે વધી જાય છે. હવે યુવા ખેલાડીઓનો વારો છે, કારણ કે બંને ટીમો રવિવારે દિવાળીના દિવસે અંડર-19 એશિયા કપમાં એકબીજા સામે ટકરાશે. ભારત અને પાકિસ્તાને પોતપોતાની શરૂઆતની મેચ જીતીને ટૂર્નામેન્ટમાં પ્રભાવશાળી શરૂઆત કરી છે. તેથી, આ ગ્રુપ A મેચ બંને ટીમો માટે મહત્વપૂર્ણ રહેશે. વિજેતા ટીમ પાસે ગ્રુપમાં ટોચ પર રહેવાની અને સેમિફાઇનલની રેસમાં પોતાનું સ્થાન મજબૂત કરવાની સારી તક હશે.
ભારતે પોતાની પહેલી મેચમાં નેપાળને 10 વિકેટથી હરાવ્યું હતું . પ્રથમ બેટિંગ કરતા નેપાળ 127 રનમાં ઓલઆઉટ થઈ ગયું હતું. જવાબમાં, ભારતે 19.1 ઓવરમાં એક પણ વિકેટ ગુમાવ્યા વિના લક્ષ્ય હાંસલ કરી લીધું. ભૂતપૂર્વ ભારતીય ઓપનર વીરેન્દ્ર સેહવાગના પુત્ર આર્યવીર સેહવાગે શાનદાર બેટિંગ કરી અને અણનમ 70 રન બનાવ્યા. તેમણે 52 બોલની પોતાની ઇનિંગમાં સાત ચોગ્ગા અને ચાર છગ્ગા ફટકાર્યા. કેપ્ટન લક્ષ્ય રાયચંદાનીએ પણ અણનમ 53 રન બનાવ્યા હતા.
ડિફેન્ડિંગ ચેમ્પિયન પાકિસ્તાને પણ પોતાના અભિયાનની શરૂઆત જીત સાથે કરી હતી. ફરહાન યુસુફની કેપ્ટનશીપવાળી ટીમે યુએઈને નવ વિકેટથી હરાવ્યું હતું. પહેલા બેટિંગ કરતા યુએઈએ 224 રન બનાવ્યા હતા. પાકિસ્તાને આ લક્ષ્યાંક 37.3 ઓવરમાં માત્ર એક વિકેટ ગુમાવીને હાંસલ કરી લીધો હતો. ઓપનર ઉસ્માન ખાને 120 બોલમાં અણનમ 139 રનની શાનદાર ઇનિંગ રમી હતી. પાછલી આવૃત્તિની ફાઇનલમાં પાકિસ્તાને ભારતને 191 રનથી હરાવીને ટાઇટલ જીત્યું હતું. તે મેચમાં ફરહાન યુસુફ પણ ટીમનું નેતૃત્વ કરી રહ્યા હતા. તેથી, આ વખતે, યુવા ભારતીય ખેલાડીઓ પાસે પાછલી ફાઇનલમાં પોતાની હારનો બદલો લેવાની તક હશે.
