ગ્રામજનોમાં ઉગ્ર રોષ‎:મડાલ-ટરૂવા-લાલપુર માર્ગ બિસ્માર

લાખણી તાલુકાના મડાલથી ટરૂવા અને લાલપુરને જોડતો આશરે 8 વર્ષ જૂનો માર્ગ હાલ અત્યંત જર્જરિત હાલતમાં છે. રસ્તા પર ઠેરઠેર મોટા ખાડા પડી ગયા છે અને રોડની બંને બાજુઓ પણ તૂટી જતાં વાહનચાલકોને એકબીજાને સાઈડ આપવામાં ભારે મુશ્કેલી પડે છે.ખાસ કરીને ચોમાસા દરમિયાન ખાડાઓમાં પાણી ભરાઈ જતાં વાહનચાલકોને ખાડાનો અંદાજ આવતો નથી, જેના કારણે અકસ્માતની ભીતિ સતત રહે છે તેમજ વાહનોને નુકસાન પણ પહોંચી રહ્યું છે.આ માર્ગ પરથી દરરોજ મોટી સંખ્યામાં ગ્રામજનો, ખેડૂતો, વિદ્યાર્થીઓ અને નોકરી-ધંધા માટે અવરજવર કરતા લોકો પસાર થાય છે, પરંતુ ખરાબ રસ્તાને કારણે તેમનું રોજિંદું જીવન મુશ્કેલ બન્યું છે. સ્થાનિક લોકો લાંબા સમયથી માર્ગના રીસર્ફેસિંગની માંગ કરી રહ્યા છે.મડાલના સરપંચ ભરતભાઈ ઠાકોરે પણ એક વર્ષ અગાઉ સંબંધિત વિભાગને લેખિત રજૂઆત કરી હતી, છતાં આજદિન સુધી કોઈ કામગીરી હાથ ધરાઈ નથી. સમયસર કાર્યવાહી નહીં થાય તો વિસ્તારના લોકો ઉગ્ર રજૂઆત અને આંદોલનનો માર્ગ અપનાવવાની ચીમકી ઉચ્ચારી છે.