બાંગ્લાદેશની ચૂંટણી પહેલા ભારતના પગલાથી ગુસ્સે ભરાયેલા યુનુસ સરકાર, કહ્યું..'અમે કંઈ કરી શકતા નથી'

ભારતે બાંગ્લાદેશથી તેના રાજદ્વારીઓના પરિવારોને પાછા બોલાવી લીધા છે, જેના કારણે હવે યુનુસ સરકારમાં ખળભળાટ મચી ગયો છે. ચૂંટણી પહેલા સુરક્ષાને ધ્યાનમાં રાખીને ભારતનું આ પગલું લેવામાં આવ્યું છે. હવે, બાંગ્લાદેશની વચગાળાની સરકારના વિદેશ સલાહકાર મોહમ્મદ તૌહીદ હુસૈને આ અંગે પ્રતિક્રિયા આપી છે. હુસૈને કહ્યું કે બાંગ્લાદેશથી ભારતીય રાજદ્વારીઓના પરિવારોને પાછા બોલાવવાનું કોઈ નક્કર કારણ નથી. તેમણે કહ્યું કે દેશમાં એવી કોઈ સુરક્ષા પરિસ્થિતિ નથી કે જેનાથી ભારતીય રાજદ્વારીઓ અથવા તેમના પરિવારો માટે કોઈ ખતરો ઉભો થાય છે. "બાંગ્લાદેશમાં એવી કોઈ પરિસ્થિતિ નથી જે ભારતીય અધિકારીઓ અથવા તેમના પરિવારો માટે કોઈ ખતરો સૂચવે છે," મોહમ્મદ તૌહીદ હુસૈને વિદેશ મંત્રાલયમાં એક પત્રકાર પરિષદ દરમિયાન જણાવ્યું હતું. તેમણે આ પગલાને ભારતનો આંતરિક મામલો ગણાવતા કહ્યું કે ભારત ગમે ત્યારે તેના અધિકારીઓ અથવા તેમના પરિવારોને પાછા બોલાવી શકે છે, પરંતુ તેની પાછળ કોઈ સ્પષ્ટ સુરક્ષા કારણ દેખાતું નથી. હુસૈને કહ્યું કે બાંગ્લાદેશને સુરક્ષા ચિંતાઓ અંગે ભારત તરફથી કોઈ ઔપચારિક સંદેશ મળ્યો નથી. "શક્ય છે કે ભારતને કોઈ આશંકા હોય અથવા તે સંદેશ મોકલવા માંગે, પરંતુ મને તેની પાછળ કોઈ સ્પષ્ટ કારણ દેખાતું નથી." ભારતમાં ભૂતપૂર્વ ડેપ્યુટી હાઈ કમિશનર હુસૈને સ્પષ્ટતા કરી કે જો ભારતીય રાજદ્વારીઓ તેમના પરિવારોને પાછા મોકલવા માંગે છે તો બાંગ્લાદેશને કોઈ વાંધો નહીં હોય. "જો તેઓ એવું કરવા માંગતા હોય, તો અમે તેના વિશે કંઈ કરી શકતા નથી." ગયા અઠવાડિયે, ભારતે વધતી હિંસા અને સુરક્ષા ચિંતાઓને ટાંકીને બાંગ્લાદેશમાં તૈનાત તેના અધિકારીઓના પરિવારોને પાછા ખેંચવાનો નિર્ણય લીધો. આ પગલું 12 ફેબ્રુઆરીના રોજ યોજાનારી સામાન્ય ચૂંટણીના થોડા અઠવાડિયા પહેલા લેવામાં આવ્યું છે. ભારતે બાંગ્લાદેશને તેના રાજદ્વારીઓ માટે બિન-પરિવારિક પોસ્ટિંગ જાહેર કર્યું છે. જો કે, ઢાકામાં હાઇ કમિશન સહિત તમામ પાંચ રાજદ્વારી મિશન (ખુલના, ચટ્ટોગ્રામ, રાજશાહી અને સિલહટ) સામાન્ય રીતે કાર્યરત છે.