ગેંગસ્ટર લોરેન્સ બિશ્નોઈ પરની વેબ સિરીઝ પર મુકાયો પ્રતિબંધ

ગેંગસ્ટર લોરેન્સ બિશ્નોઈના જીવન પર આધારિત વેબ સિરીઝ 'લોરેન્સ ઓફ પંજાબ' પર કેન્દ્ર સરકારે લાલ આંખ કરી છે. પંજાબ પોલીસે રાજ્યની શાંતિ જોખમાવાની ભીતિ વ્યક્ત કરીને કેન્દ્રને પત્ર લખ્યો હતો, જેના પગલે આ સિરીઝ પર હવે પ્રતિબંધ લાદી દેવામાં આવ્યો છે. માત્ર સરકાર જ નહીં, પરંતુ લોરેન્સના પરિવારે પણ આ સિરીઝનો સખત વિરોધ કર્યો છે. લોરેન્સના કાકા રમેશ બિશ્નોઈએ આક્ષેપ કર્યો છે કે પ્રોડક્શન ટીમે પરિવારની કોઈ પરવાનગી લીધી નથી. તેમણે સવાલ ઉઠાવ્યો છે કે જે કેસો હજુ કોર્ટમાં પેન્ડિંગ છે, તેમાં લોરેન્સને 'માસ્ટરમાઇન્ડ' તરીકે બતાવીને ન્યાયિક પ્રક્રિયાને પ્રભાવિત કરવાનો પ્રયાસ કેમ કરવામાં આવ્યો પરિવારનું કહેવું છે કે આવી સિરીઝ ભવિષ્યમાં એક દસ્તાવેજ બની જતી હોય છે, જે સમાજમાં ખોટું નેરેટિવ સ્થાપિત કરી શકે છે. હાઈકોર્ટ અને સરકારને કરાયેલી અપીલ બાદ આખરે કેન્દ્રએ આ સંવેદનશીલ કન્ટેન્ટ પર પ્રતિબંધ મૂકવાનો નિર્ણય લીધો છે.