કેન્દ્રીય મંત્રીના પ્રયાસોથી રાણાવાવને મોટી ભેટ : વંદે ભારત ટ્રેનો માટે અત્યાધુનિક કોચિંગ ડિપો બનશે

ભાવનગર રેલવે ડિવિઝન હેઠળ ₹૧૩૫.૫૮ કરોડના ખર્ચે ઇન્ટિગ્રેટેડ કોચિંગ ડિપોનું નિર્માણ થશે : પોરબંદર લોકસભા મતવિસ્તારમાં ઔદ્યોગિક અને રોજગારલક્ષી વિકાસને મળશે વેગ પોરબંદર લોકસભા મતવિસ્તારના સાંસદ અને કેન્દ્રીય શ્રમ અને રોજગાર મંત્રી મનસુખભાઈ માંડવિયાના સતત પ્રયાસોને કારણે આ વિસ્તારના વિકાસ માટે એક મોટી સફળતા મળી છે. રેલવે મંત્રાલય દ્વારા રાણાવાવ ખાતે વંદે ભારત ટ્રેનો માટે ₹૧૩૫.૫૮ કરોડના ખર્ચે અત્યાધુનિક ઇન્ટિગ્રેટેડ કોચિંગ ડિપો (ICD) ના નિર્માણને મંજૂરી આપવામાં આવી છે. આ મહત્વપૂર્ણ નિર્ણયથી પોરબંદર અને તેની આસપાસના વિસ્તારોમાં ઔદ્યોગિક અને રોજગારના નવા અવસરોનું સર્જન થશે. આ પ્રોજેક્ટ ભાવનગર રેલવે ડિવિઝન હેઠળ હાથ ધરવામાં આવશે. ઇન્ટિગ્રેટેડ કોચિંગ ડિપોના નિર્માણથી રાણાવાવ ખાતે વંદે ભારત ટ્રેનોની જાળવણી અને સારસંભાળ માટે જરૂરી તમામ આધુનિક ઇન્ફ્રાસ્ટ્રક્ચર ઉપલબ્ધ થશે. આ ડિપો વંદે ભારત ટ્રેનોની ઓપરેશનલ કાર્યક્ષમતા અને ક્ષમતામાં પણ નોંધપાત્ર વધારો કરશે. આ પ્રોજેક્ટ, વંદે ભારત સહિત અન્ય ટ્રેનો માટે જાળવણી સુવિધાઓ વિકસાવવાની વિશાળ રાષ્ટ્રીય યોજનાનો એક ભાગ છે. રાણાવાવમાં આ નવા ડિપોની સ્થાપના થકી વંદે ભારત અને LHB જેવી વિવિધ પ્રકારની ટ્રેનો માટે એકીકૃત અને આધુનિક જાળવણી સુવિધા પ્રાપ્ત થશે, જે રેલવે સેવાઓને વધુ સુદ્રઢ બનાવશે.