પ્રખ્યાત બોલિવૂડ ડિરેક્ટર રોહિત શેટ્ટીને ફરી એકવાર જાનથી મારી નાખવાની અને ખંડણી માંગતો ધમકીભર્યો ફોન આવતા માયાનગરી મુંબઈમાં ભારે ચકચાર મચી ગઈ છે. શનિવારે સવારે આવેલા આ અજ્ઞાત ફોન કરનારે રોહિત શેટ્ટી પાસે અધધ ૨૦ કરોડ રૂપિયાની ખંડણીની માંગણી કરી છે. આ ધમકીભર્યા ફોનમાં સૌથી ચોંકાવનારી વાત એ કહેવામાં આવી છે કે, 'જો આ વખતે ખંડણીની રકમ નહીં ચૂકવાય, તો નિશાન તેમનું ઘર નહીં પણ ખુદ રોહિત શેટ્ટી હશે!' આ કેસમાં પોલીસના હાથે એક ઓડિયો ક્લિપ લાગી છે. જેમાં કુખ્યાત લોરેન્સ બિશ્નોઈ ગેંગના નજીકના સાથી શુભમ લોંકરનો અવાજ હોવાનું ચર્ચાઈ રહ્યું છે.
આ એ જ શુભમ લોંકર છે જે ૨૦૨૪માં બાબા સિદ્દીકીની હત્યા અને આ વર્ષની શરૂઆતમાં રોહિત શેટ્ટીના ઘર પર થયેલા હુમલામાં વોન્ટેડ છે. હાલ મુંબઈની જુહુ પોલીસે ગુનો નોંધી આ ઓડિયો ક્લિપને ફોરેન્સિક તપાસ માટે મોકલી આપી છે. ઉલ્લેખનીય છે કે, આ પહેલાં ૧ ફેબ્રુઆરીના રોજ મોડી રાત્રે રોહિત શેટ્ટીના જુહુ સ્થિત ઘરની બહાર પાંચ રાઉન્ડ ફાયરિંગની ઘટના બની હતી, જેની જવાબદારી બિશ્નોઈ ગેંગે લીધી હતી અને શૂટર દીપક શર્માની આગ્રાથી ધરપકડ કરાઈ હતી. ત્યારે હવે ફરી ૨૦ કરોડની ખંડણીના ફોનથી રોહિત શેટ્ટીની સુરક્ષા વધારી દેવામાં આવી છે.
