પુલવામા હુમલાનો મુખ્ય આતંકવાદી સૂત્રધાર પાકિસ્તાનમાં ઠાર મરાયો છે. મુઝફ્ફરાબાદમાં અજાણ્યા હુમલાખોરોએ તેને ગોળી મારી હતી. સૂત્રોના જણાવ્યા મુજબ, આ હુમલામાં તેનું મોત થયું હતું. તે પાકિસ્તાનનો મોસ્ટ વોન્ટેડ આતંકવાદી હતો. આ આતંકવાદીની હત્યાથી જમ્મુ અને કાશ્મીરમાં કાર્યરત આતંકવાદી નેટવર્કને વધુ એક મોટો ફટકો પડ્યો છે. અરજમંદ ગુલઝાર ઉર્ફે બુરહાન હમઝા પ્રતિબંધિત આતંકવાદી સંગઠન અલ-બદ્રના મુખ્ય કમાન્ડરોમાંનો એક હતો.
સુરક્ષા એજન્સીઓના જણાવ્યા અનુસાર, તે લાંબા સમયથી ભારત વિરોધી આતંકવાદી પ્રવૃત્તિઓમાં સામેલ હતો અને દક્ષિણ કાશ્મીરમાં યુવાનોને કટ્ટરપંથી બનાવવામાં તેને મુખ્ય વ્યક્તિ માનવામાં આવતો હતો. અર્જમંદ ગુલઝાર મૂળ જમ્મુ અને કાશ્મીરના પુલવામા જિલ્લાના રત્નીપોરા વિસ્તારનો હતો. તે લગભગ સાત વર્ષ પહેલાં માન્ય દસ્તાવેજોનો ઉપયોગ કરીને પાકિસ્તાન ગયો હોવાનું કહેવાય છે, જ્યાં તે આતંકવાદી સંગઠન અલ-બદ્રમાં જોડાયો હતો. બાદમાં તે સંગઠનનો ઓપરેશનલ કમાન્ડર બન્યો અને પાકિસ્તાનથી કાશ્મીરમાં આતંકવાદી ભરતી, ભંડોળ અને શસ્ત્રો સપ્લાયનું નેટવર્ક ચલાવવાનું શરૂ કર્યું હતું.
હમઝા મોસ્ટ વોન્ટેડ યાદીમાં હતો.
ભારતીય સુરક્ષા એજન્સીઓએ તેને લાંબા સમયથી તેમની "મોસ્ટ વોન્ટેડ" યાદીમાં રાખ્યો હતો. ભારતીય ગૃહ મંત્રાલયે 2022 માં તેને સત્તાવાર રીતે આતંકવાદી જાહેર કર્યો હતો. મંત્રાલયના જણાવ્યા અનુસાર, તે પુલવામા અને દક્ષિણ કાશ્મીરમાં આતંક ફેલાવવા, આતંકવાદી સંગઠનોમાં યુવાનોની ભરતી કરવા અને આતંકવાદ માટે ભંડોળ એકત્ર કરવામાં સક્રિય રીતે સામેલ હતો.
