નવી દિલ્હી/અમદાવાદ: NEET-UG 2026 પરીક્ષાના પેપર લીક પ્રકરણમાં કેન્દ્ર સરકારે આખરે મૌન તોડ્યું છે. કેન્દ્રીય શિક્ષણ મંત્રી ધર્મેન્દ્ર પ્રધાને સ્વીકાર્યું છે કે 3 મેના રોજ લેવાયેલી પરીક્ષાનું પેપર લીક થયું હતું, જેના કારણે પારદર્શિતા જાળવવા પરીક્ષા રદ કરવાનો નિર્ણય લેવાયો છે. હવે આ પરીક્ષા રવિવાર, 21 જૂનના રોજ ફરીથી આયોજિત કરવામાં આવશે.
ફરી પરીક્ષા માટેની મહત્વની જાહેરાતો:
- એડમિટ કાર્ડ: વિદ્યાર્થીઓ 14 જૂનથી પોતાના નવા એડમિટ કાર્ડ ડાઉનલોડ કરી શકશે.
- વધારાનો સમય: પરીક્ષાના સમયમાં 15 મિનિટનો વધારો કરવામાં આવ્યો છે. હવે પરીક્ષા બપોરે 2:00 થી સાંજે 5:15 સુધી ચાલશે.
- સેન્ટર પસંદગી: વિદ્યાર્થીઓને પોતાનું મનપસંદ પરીક્ષા શહેર પસંદ કરવા માટે 7 દિવસનો સમય આપવામાં આવશે.
- કોઈ ફી નહીં: ફરીથી પરીક્ષા આપવા માટે વિદ્યાર્થીઓએ કોઈ પણ વધારાની ફી ચૂકવવી પડશે નહીં.
આવતા વર્ષથી મોટા સુધારા
શિક્ષણ મંત્રીએ જાહેરાત કરી છે કે આગામી સત્ર એટલે કે 2027થી NEET-UG પરીક્ષા સંપૂર્ણપણે કમ્પ્યુટર આધારિત (Online) લેવામાં આવશે. પેપર લીક જેવી ઘટનાઓને રોકવા માટે નેશનલ ટેસ્ટિંગ એજન્સી (NTA) માં પણ માળખાગત સુધારા કરવામાં આવશે.
તપાસનો ધમધમાટ: 7 શખ્સોની ધરપકડ
CBI આ કેસમાં કડક કાર્યવાહી કરી રહી છે. અત્યાર સુધીમાં રાજસ્થાન, હરિયાણા અને મહારાષ્ટ્રમાંથી કુલ 7 લોકોની ધરપકડ કરવામાં આવી છે. દિલ્હીની રાઉઝ એવન્યુ કોર્ટે મુખ્ય આરોપીઓને 7 દિવસની કસ્ટડીમાં મોકલી દીધા છે. બીજી તરફ, અમદાવાદ સહિત દેશભરમાં આ મામલે ઉગ્ર વિરોધ પ્રદર્શનો પણ જોવા મળી રહ્યા છે.
