કટકમાં SCB મેડિકલ કોલેજમાં ભીષણ આગ લાગી, 10 લોકોના મોત; CM મોહન માઝી ઘટનાસ્થળે પહોંચ્યા

સોમવારે વહેલી સવારે ઓડિશાના કટકમાં એસસીબી મેડિકલ કોલેજ અને હોસ્પિટલના ટ્રોમા કેર વિભાગમાં ભીષણ આગ લાગી હતી , જેના કારણે લોકોમાં ભયનો માહોલ ફેલાયો હતો. આ ઘટનામાં દસ લોકોના મોત થયા હોવાનું કહેવાય છે. એવું કહેવામાં આવી રહ્યું છે કે મોટાભાગના મૃતકો ટ્રોમા કેર આઈસીયુમાં દાખલ દર્દીઓ છે. આ ઘટના વહેલી સવારે 3 વાગ્યાની આસપાસ બની હોવાનું કહેવાય છે, જ્યારે ટ્રોમા કેર ઇમરજન્સી વિભાગના પહેલા માળે અચાનક આગ લાગી હતી. આગ લાગતાની સાથે જ હોસ્પિટલની ફાયર સેફ્ટી સિસ્ટમ સક્રિય થઈ ગઈ હતી અને હોસ્પિટલના ફાયર વિભાગે તાત્કાલિક કાર્યવાહી શરૂ કરી દીધી હતી. આગને કાબુમાં લેવા માટે તાત્કાલિક ત્રણ ફાયર એન્જિન ઘટનાસ્થળે મોકલવામાં આવ્યા હતા. ફાયર ફાઇટર્સને આગને કાબુમાં લેવા માટે ભારે જહેમત ઉઠાવવી પડી હતી. આ સમય દરમિયાન હોસ્પિટલમાં ગભરાટ ફેલાઈ ગયો હતો અને દર્દીઓના સગાઓ ગભરાટમાં આમતેમ દોડવા લાગ્યા હતા. પરિસ્થિતિને જોતાં, ICU માં રહેલા દર્દીઓને તાત્કાલિક સલામત સ્થળે ખસેડવામાં આવ્યા હતા. ગંભીર હાલતમાં દર્દીઓને હોસ્પિટલના ન્યૂ મેડિસિન ICU માં ખસેડવામાં આવ્યા હતા. આગ લાગવાનું ચોક્કસ કારણ હાલમાં અજ્ઞાત છે, અને વિગતવાર માહિતીની રાહ જોવાઈ રહી છે.