શિક્ષણના હબ ગણાતા બિહારના પટનામાંથી એક અત્યંત સનસનાટીભર્યા સમાચાર સામે આવી રહ્યા છે. દેશભરમાં લોકપ્રિય ફૈઝલ ખાન ઉર્ફે ખાન સરની કોચિંગ ઇન્સ્ટિટ્યૂટ 'ગ્લોબલ સ્ટડીઝ' પર મંગળવારે રાત્રે કેટલાક અસામાજિક તત્વો દ્વારા હિંસક હુમલો કરવામાં આવ્યો છે. આ હુમલાનો એક ચોંકાવનારો વીડિયો પણ સોશિયલ મીડિયા પર વાયરલ થયો છે. વાયરલ વીડિયોમાં સ્પષ્ટ જોઈ શકાય છે કે હુમલાખોરો કોચિંગના સિક્યોરિટી ગાર્ડને ક્રૂરતાપૂર્વક મારી રહ્યા છે, ઈંટો અને પથ્થરો ફેંકી રહ્યા છે અને સંસ્થાના પોસ્ટરો પણ ફાડી નાખ્યા છે. આ હુમલામાં ગાર્ડનું માથું ફૂટી જતાં તેને ગંભીર હાલતમાં PMCH હોસ્પિટલમાં દાખલ કરવામાં આવ્યો છે. ખાન સરે આ હુમલાનો સીધો આરોપ હરીફ સંસ્થા 'જ્ઞાનબિંદુ કોચિંગ' ના ડાયરેક્ટર અને કર્મચારીઓ પર લગાવ્યો છે.
ઘટનાની ગંભીરતાને જોઈ પટના પોલીસે ત્વરિત એક્શન લેતા જ્ઞાનબિંદુ કોચિંગના ડાયરેક્ટર રોશન આનંદ સહિત તેમના બે સહયોગીઓ અભિષેક અને ગૌરવની ધરપકડ કરી લીધી છે. જો કે, આ સમગ્ર ઘટનામાં એક નવો વળાંક આવ્યો છે. શરૂઆતમાં ખાન સરે દાવો કર્યો હતો કે ત્યાં 8 થી 10 રાઉન્ડ ફાયરિંગ થયું હતું, પરંતુ બાદમાં તેઓ પોતાના નિવેદનથી ફરી ગયા હતા અને કહ્યું કે વાતાવરણ એટલું તણાવપૂર્ણ હતું કે તેમને કંઈ સમજાયું નહીં. પોલીસે પણ ફાયરિંગની વાતનો ઇનકાર કર્યો છે અને દાખલ થયેલી FIRમાં પણ તેનો કોઈ ઉલ્લેખ નથી.
