જમ્મુ-કાશ્મીર: પાકિસ્તાની ડ્રોન ભારતીય ક્ષેત્રમાં ઘૂસ્યું, સેનાએ ફાયરિંગ કર્યું

પાકિસ્તાને ફરી એકવાર જમ્મુ અને કાશ્મીરના પૂંછમાં પોતાની નાપાક ગતિવિધિઓને અંજામ આપ્યો છે. પૂંછમાં એક પાકિસ્તાની ડ્રોન નિયંત્રણ રેખા પાર કરીને ભારતીય ક્ષેત્રમાં ઘૂસી ગયું. ત્યારબાદ ભારતીય સેનાએ તેના પર ગોળીબાર કર્યો હતો. અધિકારીઓએ જણાવ્યું હતું કે રવિવારે વહેલી સવારે જમ્મુ અને કાશ્મીરના પૂંછ જિલ્લામાં નિયંત્રણ રેખા (LoC) પાર કરીને ભારતીય ક્ષેત્રમાં પ્રવેશેલા પાકિસ્તાની ડ્રોનને સેનાના જવાનોએ ગોળીબાર કરીને તોડી પાડ્યું હતું. ૨૭ ફેબ્રુઆરીના રોજ જમ્મુ અને કાશ્મીરના પૂંચમાં પણ શંકાસ્પદ ડ્રોન જોવા મળ્યા હતા. જમ્મુ અને કાશ્મીરના પૂંચ જિલ્લામાં નિયંત્રણ રેખા (LoC) પર શંકાસ્પદ ડ્રોનની હિલચાલ જોવા મળ્યા બાદ સુરક્ષા દળોએ સર્ચ ઓપરેશન શરૂ કર્યું હતું. સેનાએ પણ શંકાસ્પદ હવાઈ હિલચાલ પર ગોળીબાર કર્યો હતો, જેના કારણે શંકાસ્પદ ડ્રોન પાછળ હટી ગયું હતું. ત્યારથી સેના એલર્ટ મોડ પર છે અને ડ્રોન ગતિવિધિઓ પર નજર રાખી રહી છે. વધુમાં, બુધવારે, સમાચાર આવ્યા કે જમ્મુ અને કાશ્મીરના પૂંછ જિલ્લાના સરહદી ગામમાં આતંકવાદીઓનું એક ઠેકાણું મળી આવ્યું છે. બે ઇમ્પ્રુવાઇઝ્ડ વિસ્ફોટક ઉપકરણો (IEDs) અને એક પિસ્તોલ સહિત શસ્ત્રોનો જથ્થો જપ્ત કરવામાં આવ્યો છે. સેનાના 'વ્હાઇટ નાઈટ કોર્પ્સ' એ સોશિયલ મીડિયા પ્લેટફોર્મ X પર એક પોસ્ટમાં કહ્યું હતું કે, "તેમના સ્ત્રોતો અને પોલીસ પાસેથી મળેલી ગુપ્ત માહિતીના આધારે, વ્હાઇટ નાઈટ કોર્પ્સ અને SOG પૂંછના સૈનિકોએ ગની જંગલ વિસ્તારમાં સંયુક્ત ઓપરેશન શરૂ કર્યું. વિગતવાર શોધખોળ દરમિયાન, સ્થળ પરથી એક મોટો IED (4.5 કિલો), એક નાનો IED (800 ગ્રામ), બે ચાઇનીઝ હેન્ડ ગ્રેનેડ, એક 9 mm પિસ્તોલ, બે 9 mm કારતૂસ અને 22 7.62 mm કારતૂસ મળી આવ્યા હતા."